ismat ka hai lihaz na parwa haya ki hai

ismat kā hai lihāz na parvā hayā kī hai

ye sin ġhazab kā hai ye javānī balā kī hai

sach pūchhiye to nāla-e-bulbul hai be-ḳhatā

phūloñ meñ saarī aag lagā.ī sabā kī hai

dil hai ajiib gul chaman-e-rozgār meñ

rañgat to phuul kī hai magar bū vafā kī hai

ḳhalvat meñ kyuuñ ye saath haiñ sab ko alag karo

shoḳhī kā hai na kaam na hājat hayā kī hai

vo haath un ke chūmtī hai maiñ huuñ pā.emāl

ye haiñ mire nasīb vo qismat hinā kī hai

anjām kyā ho dāġh-e-mohabbat kā dekhiye

siine meñ ibtidā se jalan intihā kī hai

mausam yahī to pīne-pilāne kā hai jalīl

mai-ḳhvār baaġh baaġh haiñ aamad ghaTā kī hai

ismat ka hai lihaz na parwa haya ki hai

ye sin ghazab ka hai ye jawani bala ki hai

sach puchhiye to nala-e-bulbul hai be-KHata

phulon mein sari aag lagai saba ki hai

dil hai ajib gul chaman-e-rozgar mein

rangat to phul ki hai magar bu wafa ki hai

KHalwat mein kyun ye sath hain sab ko alag karo

shoKHi ka hai na kaam na hajat haya ki hai

wo hath un ke chumti hai main hun paemal

ye hain mere nasib wo qismat hina ki hai

anjam kya ho dagh-e-mohabbat ka dekhiye

sine mein ibtida se jalan intiha ki hai

mausam yahi to pine-pilane ka hai jalil

mai-KHwar bagh bagh hain aamad ghaTa ki hai