itab mein jo tumhaare dahan se nikle hain

itaab meñ jo tumhāre dahan se nikle haiñ

vo tiir the ki sharāre badan se nikle haiñ

fusūn-e-jalva-garī kā koī asar na huā

ba-qaid-e-hosh tirī anjuman se nikle haiñ

koī maqām-e-amāñ ab nazar nahīñ aatā

bharī bahār meñ sho.ale chaman se nikle haiñ

ġham-e-hayāt ne baḳhshī fasurdagī kaisī

ye aadmī haiñ ki murde kafan se nikle haiñ

na-jāne kab se muqaddar thī dasht-paimā.ī

hazār ḳhaar mire pairahan se nikle haiñ

ye rañg-e-sub.h-e-bahārāñ ye apnī hairānī

ġhazab ḳhudā kā añdhere kiran se nikle haiñ

itab mein jo tumhaare dahan se nikle hain

wo tir the ki sharare badan se nikle hain

fusun-e-jalwa-gari ka koi asar na hua

ba-qaid-e-hosh teri anjuman se nikle hain

koi maqam-e-aman ab nazar nahin aata

bhari bahaar mein shoale chaman se nikle hain

gham-e-hayat ne baKHshi fasurdagi kaisi

ye aadmi hain ki murde kafan se nikle hain

na-jaane kab se muqaddar thi dasht-paimai

hazar KHar mere pairahan se nikle hain

ye rang-e-subh-e-bahaaran ye apni hairani

ghazab KHuda ka andhere kiran se nikle hain