itna to dosti ka sila dijiye mujhe

itnā to dostī kā sila dījiye mujhe

apnā samajh ke zahr pilā dījiye mujhe

uTThe na tā-ki aap kī jānib nazar koī

jitnī bhī tohmateñ haiñ lagā dījiye mujhe

kyuuñ aap kī ḳhushī ko mirā ġham kare udaas

ik talḳh hādisa huuñ bhulā dījiye mujhe

sidq-o-safā ne mujh ko kiyā hai bahut ḳharāb

makr-o-riyā zarūr sikhā dījiye mujhe

maiñ aap ke qarīb hī hotā huuñ har ghaḌī

mauqa kabhī paḌe to sadā dījiye mujhe

har chiiz dastiyāb hai bāzār meñ 'adam'

jhūTī ḳhushī ḳharīd ke lā dījiye mujhe

itna to dosti ka sila dijiye mujhe

apna samajh ke zahr pila dijiye mujhe

uTThe na ta-ki aap ki jaanib nazar koi

jitni bhi tohmaten hain laga dijiye mujhe

kyun aap ki KHushi ko mera gham kare udas

ek talKH hadisa hun bhula dijiye mujhe

sidq-o-safa ne mujh ko kiya hai bahut KHarab

makr-o-riya zarur sikha dijiye mujhe

main aap ke qarib hi hota hun har ghaDi

mauqa kabhi paDe to sada dijiye mujhe

har chiz dastiyab hai bazar mein 'adam'

jhuTi KHushi KHarid ke la dijiye mujhe