itne chup kyun ho majra kya hai

itne chup kyuuñ ho mājrā kyā hai

aaj 'shā.ir' tumheñ huā kyā hai

vāqi.a ye hai the isī qābil

ham jo rusvā hue burā kyā hai

hāsil-e-kā.enāt hai is meñ

mere sāġhar ko dekhtā kyā hai

dil kī bāteñ suno nigāhoñ se

ye na pūchho ki mudda.ā kyā hai

terī ik ik adā ne luuT liyā

be-vafā.ī hai kyā vafā kyā hai

sāmne apne aa.ina rakh lo

ye na dekho mujhe huā kyā hai

zarra zarra javāb de degā

pūchhiye to zarā ḳhudā kyā hai

ab to 'shā.ir' zamāna hai dushman

rāhzan kyā hai rahnumā kyā hai

itne chup kyun ho majra kya hai

aaj 'shair' tumhein hua kya hai

waqia ye hai the isi qabil

hum jo ruswa hue bura kya hai

hasil-e-kaenat hai is mein

mere saghar ko dekhta kya hai

dil ki baaten suno nigahon se

ye na puchho ki muddaa kya hai

teri ek ek ada ne luT liya

be-wafai hai kya wafa kya hai

samne apne aaina rakh lo

ye na dekho mujhe hua kya hai

zarra zarra jawab de dega

puchhiye to zara KHuda kya hai

ab to 'shair' zamana hai dushman

rahzan kya hai rahnuma kya hai