itne din ke baad tu aaya hai aaj

itne din ke baad tū aayā hai aaj

sochtā huuñ kis tarah tujh se milūñ

mere andar jaag uThī ik chāñdnī

maiñ zamīñ se āsmāñ tak añg huuñ

aur ujlā ho gayā qurbat kā chāñd

aur gahrā ho gayā terā fusūñ

ai sarāpā rañg-nik.hat tū batā

kis dhanak se terā pairāhan banūñ

saare gul-būTe tar-o-tāza hue

duur tak pahuñchī hai merī mauj-e-ḳhūñ

kar rahe haiñ lamhe lamhe kā hisāb

mil ke phir baiThe haiñ yārān-e-junūñ

dasht-e-ġham kī dhuup meñ mujh par khulā

maiñ ḳhud apnā sāya-e-dīvār huuñ

naaz kar ḳhud par ki tū hai be-shumār

qadr kar merī ki maiñ bas ek huuñ

itne din ke baad tu aaya hai aaj

sochta hun kis tarah tujh se milun

mere andar jag uThi ek chandni

main zamin se aasman tak ang hun

aur ujla ho gaya qurbat ka chand

aur gahra ho gaya tera fusun

ai sarapa rang-nikhat tu bata

kis dhanak se tera pairahan banun

sare gul-buTe tar-o-taza hue

dur tak pahunchi hai meri mauj-e-KHun

kar rahe hain lamhe lamhe ka hisab

mil ke phir baiThe hain yaran-e-junun

dasht-e-gham ki dhup mein mujh par khula

main KHud apna saya-e-diwar hun

naz kar KHud par ki tu hai be-shumar

qadr kar meri ki main bas ek hun