itne to ham-KHayal dil-e-mubtala hain hum

itne to ham-ḳhayāl dil-e-mubtalā haiñ ham

kal jis se ḳhush the aaj isī se ḳhafā haiñ ham

tujh se judā nahīñ haiñ jo tujh se judā haiñ ham

tere hī haiñ agarche tire naqsh-e-pā haiñ ham

kahte haiñ ham ko nek bhī bad bhī hazār-hā

is kī ḳhabar nahīñ hai ki dar-asl kyā haiñ ham

rutba baḌhā diyā hai junūn-e-firāq ne

ham se judā haiñ aap to sab se judā haiñ ham

tāsīr-e-ashk-o-āh ne badlā nahīñ mizāj

muddat huī ki shākī-e-āb-o-havā haiñ ham

lākhoñ jafā.eñ sah ke ab aayā hai ye ḳhayāl

milte hī kyuuñ haiñ us se jo be-mudda.ā haiñ ham

vo yaas ban ga.ī jo zamāne kī aas thī

āzurda aaj apne se be-intihā haiñ ham

jamtā hai apne zikr se ab mahfiloñ kā rañg

rahte haiñ apne ghar meñ magar jā-ba-jā haiñ ham

kyā kyā ināyateñ haiñ bas ai charḳh-e-pīr bas

terā tasadduq ab bhī kisī se judā haiñ ham

ab ittifāq-e-ahl-e-vafā tum ko kyā dikhā.eñ

mahshar meñ dekhnā ki ye sab ek jā haiñ

manzūr imtihān-e-dil-e-ishq-bāz hai

ab apne vāste bhī to sabr-āzmā haiñ ham

is par miTe hue haiñ miTātā hai jo safī'

dushman kī gā rahe haiñ baḌe ḳhush-navā haiñ ham

itne to ham-KHayal dil-e-mubtala hain hum

kal jis se KHush the aaj isi se KHafa hain hum

tujh se juda nahin hain jo tujh se juda hain hum

tere hi hain agarche tere naqsh-e-pa hain hum

kahte hain hum ko nek bhi bad bhi hazar-ha

is ki KHabar nahin hai ki dar-asl kya hain hum

rutba baDha diya hai junun-e-firaq ne

hum se juda hain aap to sab se juda hain hum

tasir-e-ashk-o-ah ne badla nahin mizaj

muddat hui ki shaki-e-ab-o-hawa hain hum

lakhon jafaen sah ke ab aaya hai ye KHayal

milte hi kyun hain us se jo be-muddaa hain hum

wo yas ban gai jo zamane ki aas thi

aazurda aaj apne se be-intiha hain hum

jamta hai apne zikr se ab mahfilon ka rang

rahte hain apne ghar mein magar ja-ba-ja hain hum

kya kya inayaten hain bas ai charKH-e-pir bas

tera tasadduq ab bhi kisi se juda hain hum

ab ittifaq-e-ahl-e-wafa tum ko kya dikhaen

mahshar mein dekhna ki ye sab ek ja hain

manzur imtihan-e-dil-e-ishq-baz hai

ab apne waste bhi to sabr-azma hain hum

is par miTe hue hain miTata hai jo safi'

dushman ki ga rahe hain baDe KHush-nawa hain hum