itni aasani se gar tujhko KHuda mil jaega

itnī āsānī se gar tujh ko ḳhudā mil jā.egā

phir to terī vahshatoñ ko hausla mil jā.egā

tikaḌmoñ se tujh ko jannat kā patā mil jā.egā

par sifārish se vahāñ kyā dāḳhila mil jā.egā

tīrgī to bas tamāsha dekhtī rah jā.egī

āñdhiy.oñ se sāzishan bujhtā diyā mil jā.egā

bechnā to hai nahīñ īmān phir bhī boliye

is kā bāzāroñ meñ ham ko daam kyā mil jā.egā

aañkh hai ghar dil galī ye jism un kā shahr hai

Dākiya ko mujh meñ hī un kā patā mil jā.egā

jhūTī shakloñ ko hai mushkil ḳhud ko vo dekheñ kahāñ

sachche chehroñ ko to phir bhī aa.ina mil jā.egā

sach to ye hai phir se us kī bātoñ meñ aa jā.eñge

aaj bhī ham ko agar vo bevafā mil jā.egā

aap ke naḳhre uThā.eñ har ghaḌī minnat kareñ

jā.iye itne meñ to ham ko ḳhudā mil jā.egā

nā-umīdī meñ bhī merī pur-umīdī dekhiye

vo huā mil kar judā ho kar judā mil jā.egā

itni aasani se gar tujh ko KHuda mil jaega

phir to teri wahshaton ko hausla mil jaega

tikaDmon se tujh ko jannat ka pata mil jaega

par sifarish se wahan kya daKHila mil jaega

tirgi to bas tamasha dekhti rah jaegi

aandhiyon se sazishan bujhta diya mil jaega

bechna to hai nahin iman phir bhi boliye

is ka bazaron mein hum ko dam kya mil jaega

aankh hai ghar dil gali ye jism un ka shahr hai

Dakiya ko mujh mein hi un ka pata mil jaega

jhuTi shaklon ko hai mushkil KHud ko wo dekhen kahan

sachche chehron ko to phir bhi aaina mil jaega

sach to ye hai phir se us ki baaton mein aa jaenge

aaj bhi hum ko agar wo bewafa mil jaega

aap ke naKHre uThaen har ghaDi minnat karen

jaiye itne mein to hum ko KHuda mil jaega

na-umidi mein bhi meri pur-umidi dekhiye

wo hua mil kar juda ho kar juda mil jaega