samne uske kabhi uski sataish nahin ki

sāmne us ke kabhī us kī satā.ish nahīñ kī

dil ne chāhā bhī agar hoñToñ ne jumbish nahīñ kī

ahl-e-mahfil pe kab ahvāl khulā hai apnā

maiñ bhī ḳhāmosh rahā us ne bhī pursish nahīñ kī

jis qadar us se ta'alluq thā chalā jaatā hai

us kā kyā ranj ho jis kī kabhī ḳhvāhish nahīñ kī

ye bhī kyā kam hai ki donoñ kā bharam qaa.em hai

us ne baḳhshish nahīñ kī ham ne guzārish nahīñ kī

ik to ham ko adab ādāb ne pyāsā rakkhā

us pe mahfil meñ surāhī ne bhī gardish nahīñ kī

ham ki dukh oḌh ke ḳhalvat meñ paḌe rahte haiñ

ham ne bāzār meñ zaḳhmoñ kī numā.ish nahīñ kī

ai mire abr-e-karam dekh ye vīrāna-e-jāñ

kyā kisī dasht pe tū ne kabhī bārish nahīñ kī

kaT mare apne qabīle kī hifāzat ke liye

maqtal-e-shahr meñ Thahre rahe jumbish nahīñ kī

vo hameñ bhuul gayā ho to ajab kyā hai 'farāz'

ham ne bhī mel-mulāqāt kī koshish nahīñ kī

samne us ke kabhi us ki sataish nahin ki

dil ne chaha bhi agar honTon ne jumbish nahin ki

ahl-e-mahfil pe kab ahwal khula hai apna

main bhi KHamosh raha us ne bhi pursish nahin ki

jis qadar us se ta'alluq tha chala jata hai

us ka kya ranj ho jis ki kabhi KHwahish nahin ki

ye bhi kya kam hai ki donon ka bharam qaem hai

us ne baKHshish nahin ki hum ne guzarish nahin ki

ek to hum ko adab aadab ne pyasa rakkha

us pe mahfil mein surahi ne bhi gardish nahin ki

hum ki dukh oDh ke KHalwat mein paDe rahte hain

hum ne bazar mein zaKHmon ki numaish nahin ki

ai mere abr-e-karam dekh ye virana-e-jaan

kya kisi dasht pe tu ne kabhi barish nahin ki

kaT mare apne qabile ki hifazat ke liye

maqtal-e-shahr mein Thahre rahe jumbish nahin ki

wo hamein bhul gaya ho to ajab kya hai 'faraaz'

hum ne bhi mel-mulaqat ki koshish nahin ki