iztirab aisa hua dil ka sahaara mujhko

iztirāb aisā huā dil kā sahārā mujh ko

koī Thahrāv nahīñ ḳhud meñ gavārā mujh ko

sar uThātī hai vo tajdīd kī ḳhvāhish mujh meñ

naqsh-gar sochne lagtā hai dobāra mujh ko

maiñ tahī-dast khaḌā thā sar-e-sahrā-e-hayāt

aarzū ne tirī yak-laḳht pukārā mujh ko

jā pahuñchnā kisī rif.at ko nahīñ hai dushvār

haañ! Thaharne kā vahāñ chāhiye yaarā mujh ko

dekh ai merī zabūñ-hālī pe hañsne vaale

vaqt kī dhuup ne kis darja nikhārā mujh ko

ek kankar sā mozāhim meñ rahūñgā kab tak

le hī jā.egā bahā kar koī dhārā mujh ko

vaqt ne jaane banānā hai mujhe kyā 'sārim'

gardish-e-chāk se ab tak na utārā mujh ko

iztirab aisa hua dil ka sahaara mujh ko

koi Thahraw nahin KHud mein gawara mujh ko

sar uThati hai wo tajdid ki KHwahish mujh mein

naqsh-gar sochne lagta hai dobara mujh ko

main tahi-dast khaDa tha sar-e-sahra-e-hayat

aarzu ne teri yak-laKHt pukara mujh ko

ja pahunchna kisi rifat ko nahin hai dushwar

han! Thaharne ka wahan chahiye yara mujh ko

dekh ai meri zabun-haali pe hansne wale

waqt ki dhup ne kis darja nikhaara mujh ko

ek kankar sa mozahim mein rahunga kab tak

le hi jaega baha kar koi dhaara mujh ko

waqt ne jaane banana hai mujhe kya 'sarim'

gardish-e-chaak se ab tak na utara mujh ko