ja baiThte ho ghairon mein ghairat nahin aati

jā baiThte ho ġhairoñ meñ ġhairat nahīñ aatī

us vaqt mirī jaan muravvat nahīñ aatī

nazdīk bhī jā kar na milā parda-nashīñ se

jā duur ho ai dil tujhe chāhat nahīñ aatī

ik ham haiñ ki haiñ nām-e-mubārak pe tasadduq

tum ko to kabhī dekh ke ulfat nahīñ aatī

yā rañj hai yā hijr hai yā huzn hai yā ġham

kuchh shakl banā kar to musībat nahīñ aatī

kyā rāh-ravī yaar kī sīkhe hai tū is saal

is tarah ga.ī jism se tāqat nahīñ aatī

har shai ke liye zarf hai darkār jahāñ meñ

kam-zarf ke nazdīk to sarvat nahīñ aatī

kalkatte ne nābūd kiyā ḳhvāb-e-ḳhushī ko

pal-bhar mujhe is shahr meñ rāhat nahīñ aatī

rahtā huuñ ḳhayāl-e-ruḳh-e-zebā meñ shab-o-roz

ai jaan tasavvur meñ vo sūrat nahīñ aatī

khilte haiñ gul-e-sher har ik roz mah-o-sāl

'aḳhtar' mire gulzār pe aafat nahīñ aatī

ja baiThte ho ghairon mein ghairat nahin aati

us waqt meri jaan murawwat nahin aati

nazdik bhi ja kar na mila parda-nashin se

ja dur ho ai dil tujhe chahat nahin aati

ek hum hain ki hain nam-e-mubarak pe tasadduq

tum ko to kabhi dekh ke ulfat nahin aati

ya ranj hai ya hijr hai ya huzn hai ya gham

kuchh shakl bana kar to musibat nahin aati

kya rah-rawi yar ki sikhe hai tu is sal

is tarah gai jism se taqat nahin aati

har shai ke liye zarf hai darkar jahan mein

kam-zarf ke nazdik to sarwat nahin aati

kalkatte ne nabud kiya KHwab-e-KHushi ko

pal-bhar mujhe is shahr mein rahat nahin aati

rahta hun KHayal-e-ruKH-e-zeba mein shab-o-roz

ai jaan tasawwur mein wo surat nahin aati

khilte hain gul-e-sher har ek roz mah-o-sal

'aKHtar' mere gulzar pe aafat nahin aati