ja ke suraj se mila din mein bhi ghar se nikla

jā ke sūraj se milā din meñ bhī ghar se niklā

ba.ad muddat maiñ charāġhoñ ke asar se niklā

ab to mil jaatī haiñ har moḌ pe āñkheñ achchhī

terī āñkhoñ kā vo kāñTā bhī nazar se niklā

kitnī kam-go thī mirī jān-e-suḳhan vo ḳhushbū

baat karne kā bahāna bhī agar se niklā

jaane kis kis ko diye mere hazāroñ dil the

ye ḳhazāna mire siine ke khañDar se niklā

mujh ko to gardish-e-daurāñ ne diyā hai lahja

merā matlab to isī zer-o-zabar se niklā

vo bhī mahfil meñ chalī aa.ī hai pīchhe pīchhe

maiñ to ghar se isī tanhā.ī ke Dar se niklā

jis kī chhāñv meñ sukūñ paa.eñ suḳhan ke panchhī

peḌ vo merī hī mehnat ke samar se niklā

mujh ko le Duubī farāvānī ye sīm-o-zar kī

saarā mehnat kā mazā luqma-e-tar se niklā

ho-na-ho is meñ koī raaz chhupā hai 'aḳhtar'

kaam aksar to ḳhudā kā bhī bashar se niklā

ja ke suraj se mila din mein bhi ghar se nikla

baad muddat main charaghon ke asar se nikla

ab to mil jati hain har moD pe aankhen achchhi

teri aankhon ka wo kanTa bhi nazar se nikla

kitni kam-go thi meri jaan-e-suKHan wo KHushbu

baat karne ka bahana bhi agar se nikla

jaane kis kis ko diye mere hazaron dil the

ye KHazana mere sine ke khanDar se nikla

mujh ko to gardish-e-dauran ne diya hai lahja

mera matlab to isi zer-o-zabar se nikla

wo bhi mahfil mein chali aai hai pichhe pichhe

main to ghar se isi tanhai ke Dar se nikla

jis ki chhanw mein sukun paen suKHan ke panchhi

peD wo meri hi mehnat ke samar se nikla

mujh ko le Dubi farawani ye sim-o-zar ki

sara mehnat ka maza luqma-e-tar se nikla

ho-na-ho is mein koi raaz chhupa hai 'aKHtar'

kaam aksar to KHuda ka bhi bashar se nikla