jada-e-ishq mein gir gir ke sambhalte rahna

jāda-e-ishq meñ gir gir ke sambhalte rahnā

paañv jal jaa.eñ magar aag pe chalte rahnā

jalva-e-amn tumhīñ se hai mohabbat vaalo

mahr-e-tābāñ kī tarah roz nikalte rahnā

naġhma-e-ishq na ho ek hī dhun par qaa.im

vaqt ke saath zarā raag badalte rahnā

zindagī ko mah-o-anjum na ujālā deñge

tum na in jhūTe khilaunoñ se bahalte rahnā

hai yahī vaqt-e-amal johd-e-musalsal kī qasam

be-sahāroñ kī tarah haath na malte rahnā

zindagānī hai faqat garmī-e-raftār kā naam

manzileñ saath liye raah pe chalte rahnā

hai sitāroñ kī tarah mā.il-e-parvāz 'shakīl'

dushmano tum ko qasam hai yūñhī jalte rahnā

jada-e-ishq mein gir gir ke sambhalte rahna

panw jal jaen magar aag pe chalte rahna

jalwa-e-amn tumhin se hai mohabbat walo

mahr-e-taban ki tarah roz nikalte rahna

naghma-e-ishq na ho ek hi dhun par qaim

waqt ke sath zara rag badalte rahna

zindagi ko mah-o-anjum na ujala denge

tum na in jhuTe khilaunon se bahalte rahna

hai yahi waqt-e-amal johd-e-musalsal ki qasam

be-sahaaron ki tarah hath na malte rahna

zindagani hai faqat garmi-e-raftar ka nam

manzilen sath liye rah pe chalte rahna

hai sitaron ki tarah mail-e-parwaz 'shakil'

dushmano tum ko qasam hai yunhi jalte rahna