jada-e-rah KHur ko waqt-e-sham hai tar-e-shuaa

jāda-e-rah ḳhur ko vaqt-e-shām hai tār-e-shuā.a

charḳh vā kartā hai māh-e-nau se āġhosh-e-vidā.a

sham.a se hai bazm-e-añgusht-e-tahayyur dar dahan

sho.ala-e-āvāz-e-ḳhūbāñ par ba-hañgām-e-simā.a

juuñ par-e-tā.ūs jauhar taḳhta mashq-e-rañg hai

bas-ki hai vo qibla-e-ā.īna mahv-e-iḳhtirā.a

ranjish-e-hairat-sarishtāñ sīna-sāfī peshkash

jauhar-e-ā.īna hai yaañ gard-e-maidān-e-nazā.a

chaar sū-e-dahr meñ bāzār-e-ġhaflat garm hai

aql ke nuqsāñ se uThtā hai ḳhayāl-e-intifā.a

āshnā 'ġhālib' nahīñ haiñ dard-e-dil ke āshnā

varna kis ko mere afsāne kī tāb-e-istimā.a

jada-e-rah KHur ko waqt-e-sham hai tar-e-shuaa

charKH wa karta hai mah-e-nau se aaghosh-e-widaa

shama se hai bazm-e-angusht-e-tahayyur dar dahan

shoala-e-awaz-e-KHuban par ba-hangam-e-simaa

jun par-e-taus jauhar taKHta mashq-e-rang hai

bas-ki hai wo qibla-e-aina mahw-e-iKHtiraa

ranjish-e-hairat-sarishtan sina-safi peshkash

jauhar-e-aina hai yan gard-e-maidan-e-nazaa

chaar su-e-dahr mein bazar-e-ghaflat garm hai

aql ke nuqsan se uThta hai KHayal-e-intifaa

aashna 'ghaalib' nahin hain dard-e-dil ke aashna

warna kis ko mere afsane ki tab-e-istimaa