jal mein zar ke agar moti ka dana hoga

jaal meñ zar ke agar motī kā daanā hogā

vo na is daam meñ āvegā jo daanā hogā

dām-e-zulf aur jahāñ ḳhaal kā daanā hogā

phañs hī jāvegā ġharaz kaisā hī daanā hogā

dil ko ham laa.e the mizhgāñ kī safeñ dikhlāne

ye na samjhe the ki tīroñ kā nishānā hogā

aaj dekh is ne mirī chaah kī chitvan yaaro

muñh se go kuchh na kahā dil meñ to jaanā hogā

bhar nazar dekheñge us ahd-shikan kī sūrat

dekhiye kaun sā yā-rab vo zamānā hogā

ḳhuuñ bahāne kā mire hashr meñ jab hogā bahā

dekheñ kyā us ghaḌī qātil ko bahānā hogā

vo bhī kuchh aisī hī kah degā ki jis se us ko

baat kī baat bahāne kā bahānā hogā

talḳhī-e-marg jise kahte haiñ afsos afsos

ek din sab ke ta.iiñ zahr ye khānā hogā

dekh le is chaman-e-dahr ko dil bhar ke 'nazīr'

phir tirā kaahe ko is baaġh meñ aanā hogā

jal mein zar ke agar moti ka dana hoga

wo na is dam mein aawega jo dana hoga

dam-e-zulf aur jahan KHal ka dana hoga

phans hi jawega gharaz kaisa hi dana hoga

dil ko hum lae the mizhgan ki safen dikhlane

ye na samjhe the ki tiron ka nishana hoga

aaj dekh is ne meri chah ki chitwan yaro

munh se go kuchh na kaha dil mein to jaana hoga

bhar nazar dekhenge us ahd-shikan ki surat

dekhiye kaun sa ya-rab wo zamana hoga

KHun bahane ka mere hashr mein jab hoga baha

dekhen kya us ghaDi qatil ko bahana hoga

wo bhi kuchh aisi hi kah dega ki jis se us ko

baat ki baat bahane ka bahana hoga

talKHi-e-marg jise kahte hain afsos afsos

ek din sab ke tain zahr ye khana hoga

dekh le is chaman-e-dahr ko dil bhar ke 'nazir'

phir tera kahe ko is bagh mein aana hoga