jam to jam mai-e-hosh-ruba bhi badli

jaam to jaam mai-e-hosh-rubā bhī badlī

saath hī rindoñ ke piine kī adā bhī badlī

fasl-e-gul badlī sabā badlī fazā bhī badlī

aap badle to gulistāñ kī havā bhī badlī

TuuT jā.egā yaqīnan dil-e-mai-ḳhvār agar

nigah-e-sāqī-e-mai-ḳhāna zarā bhī badlī

bazm-e-yārāñ meñ sadā se mujhe pahchāntā kaun

mere hālāt jo badle to sadā bhī badlī

aaj tak us ne to va.ada koī iifā na kiyā

jaane kyā soch ke phir shart-e-vafā bhī badlī

hone lagtā hai kuchh ehsās shikast-e-tauba

bāda-ḳhāne pe agar chhā.ī zarā bhī badlī

vaqt ke saath badal jaatī hai har shai 'ājiz'

aap to badle magar ḳhū-e-jafā bhī badlī

jam to jam mai-e-hosh-ruba bhi badli

sath hi rindon ke pine ki ada bhi badli

fasl-e-gul badli saba badli faza bhi badli

aap badle to gulistan ki hawa bhi badli

TuT jaega yaqinan dil-e-mai-KHwar agar

nigah-e-saqi-e-mai-KHana zara bhi badli

bazm-e-yaran mein sada se mujhe pahchanta kaun

mere haalat jo badle to sada bhi badli

aaj tak us ne to wada koi ifa na kiya

jaane kya soch ke phir shart-e-wafa bhi badli

hone lagta hai kuchh ehsas shikast-e-tauba

baada-KHane pe agar chhai zara bhi badli

waqt ke sath badal jati hai har shai 'ajiz'

aap to badle magar KHu-e-jafa bhi badli