jaan-e-ayyam-e-dilbari hai yaad

jān-e-ayyām-e-dilbarī hai yaad

sair-e-gul-zār-o-mai-ḳhorī hai yaad

dekhtā nahiñ suraj kuuñ nazrāñ bhar

jis kuuñ tujh jāma-e-zarī hai yaad

ḳhuub phūlī thī baaġh meñ nargis

gul-e-sad-barg-o-jāfarī hai yaad

vo charāġhāñ o chāñdnī kī raat

sair-e-hat-phūl o phuljhaḌī hai yaad

vo tamāshā o khel holī kā

sab ke tan raḳht-e-kesarī hai yaad

ho divānā jañgal meñ kyuuñ na phire

jis ko vo sāya-e-parī hai yaad

ai siyah mast merī añkhiyoñ kī

laal bādal kī tujh jhurī hai yaad

jab tuman paas 'fā.ez' aayā thā

baat kahnā bī sarsarī hai yaad

jaan-e-ayyam-e-dilbari hai yaad

sair-e-gul-zar-o-mai-KHori hai yaad

dekhta nahin suraj kun nazran bhar

jis kun tujh jama-e-zari hai yaad

KHub phuli thi bagh mein nargis

gul-e-sad-barg-o-jafari hai yaad

wo charaghan o chandni ki raat

sair-e-hat-phul o phuljhaDi hai yaad

wo tamasha o khel holi ka

sab ke tan raKHt-e-kesari hai yaad

ho diwana jangal mein kyun na phire

jis ko wo saya-e-pari hai yaad

ai siyah mast meri ankhiyon ki

lal baadal ki tujh jhuri hai yaad

jab tuman pas 'faez' aaya tha

baat kahna bi sarsari hai yaad