jaan-e-nashat husn ki duniya kahen jise

jān-e-nashāt husn kī duniyā kaheñ jise

jannat hai ek ḳhūn-e-tamannā kaheñ jise

us jalva-gāh-e-husn meñ chhāyā hai har taraf

aisā hijāb chashm-e-tamāshā kaheñ jise

ye asl zindagī hai ye jān-e-hayāt hai

husn-e-mazāq shorish-e-saudā kaheñ jise

mere vida-e-hosh ko itnā bhī hai bahut

ye aab o rañg husn kā parda kaheñ jise

aksar rahā hai husn-e-haqīqat bhī sāmne

ik mustaqil sarāb-e-tamannā kaheñ jise

ab tak tamām fikr o nazar par muhīt hai

shakl-e-sifāt māni-e-ashiyā kaheñ jise

har mauj kī vo shaan hai jām-e-sharāb meñ

barq-e-fazā-e-vadi-e-sīnā kaheñ jise

zindāniyoñ ko aa ke na chheḌā kare bahut

jān-e-bahār nik.hat-e-rusvā kaheñ jise

is haul-e-dil se garm-rau-e-arsa-e-vajūd

merā hī kuchh ġhubār hai duniyā kaheñ jise

sarmastiyoñ meñ shīsha-e-mai le ke haath meñ

itnā uchhāl deñ ki surayyā kaheñ jise

shāyad mire sivā koī us ko samajh sake

vo rabt-e-ḳhās ranjish-e-bejā kaheñ jise

merī nigāh-e-shauq pe ab tak hai mun.akis

husn-e-ḳhayāl shāhid-e-zebā kaheñ jise

dil jalva-gāh-e-husn banā faiz-e-ishq se

vo daaġh hai ki shāhid-e-rānā kaheñ jise

'asġhar' na kholnā kisī hikmat-ma.āb par

rāz-e-hayāt sāġhar o miinā kaheñ jise

jaan-e-nashat husn ki duniya kahen jise

jannat hai ek KHun-e-tamanna kahen jise

us jalwa-gah-e-husn mein chhaya hai har taraf

aisa hijab chashm-e-tamasha kahen jise

ye asl zindagi hai ye jaan-e-hayat hai

husn-e-mazaq shorish-e-sauda kahen jise

mere wida-e-hosh ko itna bhi hai bahut

ye aab o rang husn ka parda kahen jise

aksar raha hai husn-e-haqiqat bhi samne

ek mustaqil sarab-e-tamanna kahen jise

ab tak tamam fikr o nazar par muhit hai

shakl-e-sifat mani-e-ashiya kahen jise

har mauj ki wo shan hai jam-e-sharab mein

barq-e-faza-e-wadi-e-sina kahen jise

zindaniyon ko aa ke na chheDa kare bahut

jaan-e-bahaar nikhat-e-ruswa kahen jise

is haul-e-dil se garm-rau-e-arsa-e-wajud

mera hi kuchh ghubar hai duniya kahen jise

sarmastiyon mein shisha-e-mai le ke hath mein

itna uchhaal den ki surayya kahen jise

shayad mere siwa koi us ko samajh sake

wo rabt-e-KHas ranjish-e-beja kahen jise

meri nigah-e-shauq pe ab tak hai munakis

husn-e-KHayal shahid-e-zeba kahen jise

dil jalwa-gah-e-husn bana faiz-e-ishq se

wo dagh hai ki shahid-e-rana kahen jise

'asghar' na kholna kisi hikmat-maab par

raaz-e-hayat saghar o mina kahen jise