jaan hi jae to jae dard-e-dil

jaan hī jaa.e to jaa.e dard-e-dil

ik yahī hai ab davā-e-dard-e-dil

ab taḌapne meñ mazā miltā nahīñ

ho chalī jaañ āshnā-e-dard-e-dil

imtihān-e-zabt hai manzūr aaj

jis qadar chāhe satā.e dard-e-dil

bhāgtī hai duur jis se maut bhī

vo balā hai ye balā-e-dard-e-dil

rahm kab aayā kisī be-dard ko

ho chukī jab intihā-e-dard-e-dil

khā ke kuchh so rahte haiñ hirmāñ-nasīb

ek ye bhī hai davā-e-dard-e-dil

ham marīzoñ kā nahīñ mumkin ilaaj

lā-davā haiñ mubtalā-e-dard-e-dil

rahtī hai siine hī par tasvīr-e-dost

hai ye ta.avīz ik barā-e-dard-e-dil

rote rote bañdh ga.ī hichkī 'hafīz'

jab kahā kuchh mājrā-e-dard-e-dil

jaan hi jae to jae dard-e-dil

ek yahi hai ab dawa-e-dard-e-dil

ab taDapne mein maza milta nahin

ho chali jaan aashna-e-dard-e-dil

imtihan-e-zabt hai manzur aaj

jis qadar chahe satae dard-e-dil

bhagti hai dur jis se maut bhi

wo bala hai ye bala-e-dard-e-dil

rahm kab aaya kisi be-dard ko

ho chuki jab intiha-e-dard-e-dil

kha ke kuchh so rahte hain hirman-nasib

ek ye bhi hai dawa-e-dard-e-dil

hum marizon ka nahin mumkin ilaj

la-dawa hain mubtala-e-dard-e-dil

rahti hai sine hi par taswir-e-dost

hai ye tawiz ek bara-e-dard-e-dil

rote rote bandh gai hichki 'hafiz'

jab kaha kuchh majra-e-dard-e-dil