jaan kar kahta hai humse apne jaane ki KHabar

jaan kar kahtā hai ham se apne jaane kī ḳhabar

jī Dubā detī hai merā ye bahāne kī ḳhabar

is chaman meñ kaun hai dil-soz apnā tujh sivā

rakhiyo Tuk ai barq mere āshiyāne kī ḳhabar

pūchhtā niiñ apne kūche meñ tū merā haal haa.e

le thī lailā dasht meñ apne divāne kī ḳhabar

haiñ qafas meñ jab se ham us sañg-dil sayyād ke

ashk hī letā hai merā āb-o-dāne kī ḳhabar

ham na jāneñ kis taraf ka.aba hai aur kīdhar hai dair

ek rahtī hai yahī us dar pe jaane kī ḳhabar

har gul-e-dāġh-e-junūñ par aur hai kuchh āb-o-rañg

pher hai gulshan meñ goyā gul ke aane kī ḳhabar

aaj siine meñ mire dil hai nipaT hī be-qarār

de hai 'hasrat' ġhair ke ghar us ke jaane kī ḳhabar

jaan kar kahta hai hum se apne jaane ki KHabar

ji Duba deti hai mera ye bahane ki KHabar

is chaman mein kaun hai dil-soz apna tujh siwa

rakhiyo Tuk ai barq mere aashiyane ki KHabar

puchhta nin apne kuche mein tu mera haal hae

le thi laila dasht mein apne diwane ki KHabar

hain qafas mein jab se hum us sang-dil sayyaad ke

ashk hi leta hai mera aab-o-dane ki KHabar

hum na jaanen kis taraf kaba hai aur kidhar hai dair

ek rahti hai yahi us dar pe jaane ki KHabar

har gul-e-dagh-e-junun par aur hai kuchh aab-o-rang

pher hai gulshan mein goya gul ke aane ki KHabar

aaj sine mein mere dil hai nipaT hi be-qarar

de hai 'hasrat' ghair ke ghar us ke jaane ki KHabar