jaan si aa gai hai jaan mein kya

jaan sī aa ga.ī hai jaan meñ kyā

kah ga.e haiñ vo mere kaan meñ kyā

mujh se hāl-e-dil-e-tabāh na pūchh

ab hai ujḌe hue makān meñ kyā

merā har zaḳhm kyoñ mahaktā hai

phuul rakhte ho tum kamān meñ kyā

pūchhte haiñ mujhe dikhā ke shafaq

ḳhuun barsā hai āsmān meñ kyā

baat kahne se peshtar socho

tiir lauT aa.egā kamān meñ kyā

terā jalva hai aur kuchh bhī nahīñ

tū hī to hai bhare jahān meñ kyā

be-vafā us ko rū-ba-rū kahiye

paḌ ga.e qufl ab zabān meñ kyā

pyaar hoñToñ pe aur dil meñ fareb

kyā zabāñ par hai aur gumān meñ kyā

'ehtishām' ek lafz-e-ġham kī jagah

aur hai terī dāstān meñ kyā

jaan si aa gai hai jaan mein kya

kah gae hain wo mere kan mein kya

mujh se haal-e-dil-e-tabah na puchh

ab hai ujDe hue makan mein kya

mera har zaKHm kyon mahakta hai

phul rakhte ho tum kaman mein kya

puchhte hain mujhe dikha ke shafaq

KHun barsa hai aasman mein kya

baat kahne se peshtar socho

tir lauT aaega kaman mein kya

tera jalwa hai aur kuchh bhi nahin

tu hi to hai bhare jahan mein kya

be-wafa us ko ru-ba-ru kahiye

paD gae qufl ab zaban mein kya

pyar honTon pe aur dil mein fareb

kya zaban par hai aur guman mein kya

'ehtisham' ek lafz-e-gham ki jagah

aur hai teri dastan mein kya