jaana chaho to kis ne roka hai

jaanā chāho to kis ne rokā hai

bin mire jī sakoge achchhā hai

jab se us ne kahā ḳhudā-hāfiz

tab se sab kuchh dhuāñ dhuāñ sā hai

aap se dhaḌkanoñ kī raunaq hai

dil mujhe aap jaisā lagtā hai

tum nahīñ aa.e milne sāvan meñ

bārishoñ kā mizāj phīkā hai

ye to bas dil hī jāntā hai mirā

maiñ ne kis dil se tujh ko chhoḌā hai

kal huā thā guzar yahāñ us kā

shahr kā paanī kal se mīThā hai

mujh ko duniyā samajh meñ kyā aatī

ek hī shaḳhs ko jo sochā hai

ḳhud se bantī nahīñ kabhī 'iqrā'

jaane kis baat kā ye jhagḌā hai

jaana chaho to kis ne roka hai

bin mere ji sakoge achchha hai

jab se us ne kaha KHuda-hafiz

tab se sab kuchh dhuan dhuan sa hai

aap se dhaDkanon ki raunaq hai

dil mujhe aap jaisa lagta hai

tum nahin aae milne sawan mein

barishon ka mizaj phika hai

ye to bas dil hi jaanta hai mera

main ne kis dil se tujh ko chhoDa hai

kal hua tha guzar yahan us ka

shahr ka pani kal se miTha hai

mujh ko duniya samajh mein kya aati

ek hi shaKHs ko jo socha hai

KHud se banti nahin kabhi 'iqra'

jaane kis baat ka ye jhagDa hai