jaana hai usi samt ki chaara nahin koi

jaanā hai usī samt ki chāra nahīñ koī

jis samt ko rasta bhī nikaltā nahīñ koī

bas dil kā hai saudā koī baazī nahīñ sar kī

thoḌā sā hai nuqsān ziyāda nahīñ koī

mañjdhār meñ kashtī kā badalnā nahīñ manzūr

aisī mujhe sāhil kī tamannā nahīñ koī

har shaḳhs yahāñ gumbad-e-be-dar kī tarah hai

āvāz pe āvāz do suntā nahīñ koī

ham sīna-sipar aa ga.e maidān-e-viġhā meñ

ab kyuuñ saf-e-ādā se nikaltā nahīñ koī

maanā ki burā hai jo kam-āmez huuñ itnā

ye terā taġhāful bhī to achchhā nahīñ koī

vo shobada-gar hī na rahā khel huā ḳhatm

hone ko bas ab aur tamāshā nahīñ koī

ik naqd-e-hunar hai ki nahīñ jis kī koī qadr

paas is ke sivā aur asāsa nahīñ koī

pāmāli-e-gulshan kī ye tasvīr hai 'mohsin'

shādābi-e-gulshan kā ye naqsha nahīñ koī

jaana hai usi samt ki chaara nahin koi

jis samt ko rasta bhi nikalta nahin koi

bas dil ka hai sauda koi bazi nahin sar ki

thoDa sa hai nuqsan ziyaada nahin koi

manjdhaar mein kashti ka badalna nahin manzur

aisi mujhe sahil ki tamanna nahin koi

har shaKHs yahan gumbad-e-be-dar ki tarah hai

aawaz pe aawaz do sunta nahin koi

hum sina-sipar aa gae maidan-e-wigha mein

ab kyun saf-e-ada se nikalta nahin koi

mana ki bura hai jo kam-amez hun itna

ye tera taghaful bhi to achchha nahin koi

wo shobada-gar hi na raha khel hua KHatm

hone ko bas ab aur tamasha nahin koi

ek naqd-e-hunar hai ki nahin jis ki koi qadr

pas is ke siwa aur asasa nahin koi

pamali-e-gulshan ki ye taswir hai 'mohsin'

shadabi-e-gulshan ka ye naqsha nahin koi