jaana mujhe kidhar tha kis samt chal raha hun

jaanā mujhe kidhar thā kis samt chal rahā huuñ

ik umr maiñ tumhārā nemul-badal rahā huuñ

jalte haiñ log tapte sūraj kī raushnī se

maiñ rū-siyāh kab se zulmat meñ jal rahā huuñ

utrā thā chāñd merī ḳhvāboñ kī anjuman meñ

maiñ us ghaḌī se ab tak āñkheñ masal rahā huuñ

ab tak basī huī hai ḳhushbū mire badan meñ

kahte haiñ is se bāham do-chār pal rahā huuñ

shātir hai vaqt dekho kyā chaal chal gayā hai

jis kī hai aaj duniyā maiñ us kā kal rahā huuñ

mere qadam ba-zāhir aage ko baḌh rahe haiñ

lekin haqīqatan maiñ din raat Dhal rahā huuñ

uTh kar girā huuñ aksar chāhat kī justujū meñ

gir kar maiñ 'ābdī' ab phir se sambhal rahā huuñ

jaana mujhe kidhar tha kis samt chal raha hun

ek umr main tumhaara nemul-badal raha hun

jalte hain log tapte suraj ki raushni se

main ru-siyah kab se zulmat mein jal raha hun

utra tha chand meri KHwabon ki anjuman mein

main us ghaDi se ab tak aankhen masal raha hun

ab tak basi hui hai KHushbu mere badan mein

kahte hain is se baham do-chaar pal raha hun

shatir hai waqt dekho kya chaal chal gaya hai

jis ki hai aaj duniya main us ka kal raha hun

mere qadam ba-zahir aage ko baDh rahe hain

lekin haqiqatan main din raat Dhal raha hun

uTh kar gira hun aksar chahat ki justuju mein

gir kar main 'abdi' ab phir se sambhal raha hun