jaanan gae dinon ka talluq bahaal kar

jānāñ ga.e dinoñ kā ta.alluq bahāl kar

ā.īna ban gayā huuñ mirī dekh-bhāl kar

apnī hī rahguzar ke bujhātā hai kyuuñ charāġh

har rāste se merā guzarnā muhāl kar

ik roz aisā ho ki charāġhoñ ke rū-ba-rū

kuchh meñ hunar karūñ koī tū bhī kamāl kar

tahvīl-e-intizār meñ kab tak rahegī aañkh

mere supurd merī nazar kā ma.aal kar

Dar hai kahīñ maiñ dasht kī jānib nikal na jā.ūñ

baiThā huuñ apne paañv meñ zanjīr Daal kar

'mohsin' bure dinoñ meñ nayā dost kaun ho

hai jis kā pahlā qarz usī se savāl kar

jaanan gae dinon ka talluq bahaal kar

aaina ban gaya hun meri dekh-bhaal kar

apni hi rahguzar ke bujhata hai kyun charagh

har raste se mera guzarna muhaal kar

ek roz aisa ho ki charaghon ke ru-ba-ru

kuchh mein hunar karun koi tu bhi kamal kar

tahwil-e-intizar mein kab tak rahegi aankh

mere supurd meri nazar ka maal kar

Dar hai kahin main dasht ki jaanib nikal na jaun

baiTha hun apne panw mein zanjir Dal kar

'mohsin' bure dinon mein naya dost kaun ho

hai jis ka pahla qarz usi se sawal kar