jaane in aankhon mein ye kaisa nasha rakkha hai

jaane in āñkhoñ meñ ye kaisā nasha rakkhā hai

jis ne dekhā use badmast banā rakkhā hai

tum pilāoge to pī leñge hameñ kyā is se

zahr hai jaam meñ yā āb-e-baqā rakkhā hai

ham-nashīnī se tumhārī hai bahār-e-hastī

in shab-o-roz meñ tum hī kaho kyā rakkhā hai

is tarah aane se behtar thā na aate sāhab

chand lamhoñ kī mulāqāt meñ kyā rakkhā hai

mausamoñ kī tarah badlā kiye vo par ham ne

ḳhud ko har haal meñ pāband-e-vafā rakkhā hai

aap kā bazm-e-tasavvur meñ chale aa jaanā

ham ko māhaul se begāna banā rakkhā hai

she'r apne nahīñ mamnūn kisī ke 'najmī'

ham ne bā-fazl-e-ḳhudā zehn-e-rasā rakkhā hai

jaane in aankhon mein ye kaisa nasha rakkha hai

jis ne dekha use badmast bana rakkha hai

tum pilaoge to pi lenge hamein kya is se

zahr hai jam mein ya aab-e-baqa rakkha hai

ham-nashini se tumhaari hai bahaar-e-hasti

in shab-o-roz mein tum hi kaho kya rakkha hai

is tarah aane se behtar tha na aate sahab

chand lamhon ki mulaqat mein kya rakkha hai

mausamon ki tarah badla kiye wo par hum ne

KHud ko har haal mein paband-e-wafa rakkha hai

aap ka bazm-e-tasawwur mein chale aa jaana

hum ko mahaul se begana bana rakkha hai

she'r apne nahin mamnun kisi ke 'najmi'

hum ne ba-fazl-e-KHuda zehn-e-rasa rakkha hai