jaane kahan gaya hai wo wo jo abhi yahan tha

jaane kahāñ gayā hai vo vo jo abhī yahāñ thā

vo jo abhī yahāñ thā vo kaun thā kahāñ thā

tā-lamha-e-guzishtā ye jism aur saa.e

zinda the rā.egāñ meñ jo kuchh thā rā.egāñ thā

ab jis kī diid kā hai saudā hamāre sar meñ

vo apnī hī nazar meñ apnā hī ik samāñ thā

kyā kyā na ḳhuun thūkā maiñ us galī meñ yaaro

sach jānñā vahāñ to jo fan thā rā.egāñ thā

ye vaar kar gayā hai pahlū se kaun mujh par

thā maiñ hī daa.eñ baa.eñ aur maiñ hī darmiyāñ thā

us shahr kī hifāzat karnī thī ham ko jis meñ

āñdhī kī thiiñ fasīleñ aur gard kā makāñ thā

thī ik ajab fazā sī imkān-e-ḳhāl-o-ḳhad kī

thā ik ajab musavvir aur vo mirā gumāñ thā

umreñ guzar ga.ī thiiñ ham ko yaqīñ se bichhḌe

aur lamha ik gumāñ kā sadiyoñ meñ be-amāñ thā

jab Dūbtā chalā maiñ tārīkiyoñ kī tah meñ

tah meñ thā ik darīcha aur us meñ āsmāñ thā

jaane kahan gaya hai wo wo jo abhi yahan tha

wo jo abhi yahan tha wo kaun tha kahan tha

ta-lamha-e-guzishta ye jism aur sae

zinda the raegan mein jo kuchh tha raegan tha

ab jis ki did ka hai sauda hamare sar mein

wo apni hi nazar mein apna hi ek saman tha

kya kya na KHun thuka main us gali mein yaro

sach jaanna wahan to jo fan tha raegan tha

ye war kar gaya hai pahlu se kaun mujh par

tha main hi daen baen aur main hi darmiyan tha

us shahr ki hifazat karni thi hum ko jis mein

aandhi ki thin fasilen aur gard ka makan tha

thi ek ajab faza si imkan-e-KHal-o-KHad ki

tha ek ajab musawwir aur wo mera guman tha

umren guzar gai thin hum ko yaqin se bichhDe

aur lamha ek guman ka sadiyon mein be-aman tha

jab Dubta chala main tarikiyon ki tah mein

tah mein tha ek daricha aur us mein aasman tha