jaane kisi ne kya kaha tez hawa ke shor mein

jaane kisī ne kyā kahā tez havā ke shor meñ

mujh se sunā nahīñ gayā tez havā ke shor meñ

maiñ bhī tujhe na sun sakā tū bhī mujhe na sun sakā

tujh se huā mukālima tez havā ke shor meñ

kashtiyoñ vaale be-ḳhabar baḌhte rahe bhañvar kī samt

aur maiñ chīḳhtā rahā tez havā ke shor meñ

merī zabān-e-ātishīñ lau thī mire charāġh kī

merā charāġh chup na thā tez havā ke shor meñ

jaise ḳharosh-e-bahr meñ shor-e-parind Duub jaa.e

Duub ga.ī mirī sadā tez havā ke shor meñ

nauhagarān-e-shām-e-ġham tum ne sunā nahīñ magar

kaisā ajiib dard thā tez havā ke shor meñ

mere makāñ kī chhat pe the tā.er-e-shab Dare Dare

jaise payām-e-marg thā tez havā ke shor meñ

minnat-e-gosh-e-be-hisāñ kaun uThā.e ab 'salīm'

nauha-e-ġham milā diyā tez havā ke shor meñ

jaane kisi ne kya kaha tez hawa ke shor mein

mujh se suna nahin gaya tez hawa ke shor mein

main bhi tujhe na sun saka tu bhi mujhe na sun saka

tujh se hua mukalima tez hawa ke shor mein

kashtiyon wale be-KHabar baDhte rahe bhanwar ki samt

aur main chiKHta raha tez hawa ke shor mein

meri zaban-e-atishin lau thi mere charagh ki

mera charagh chup na tha tez hawa ke shor mein

jaise KHarosh-e-bahr mein shor-e-parind Dub jae

Dub gai meri sada tez hawa ke shor mein

nauhagaran-e-sham-e-gham tum ne suna nahin magar

kaisa ajib dard tha tez hawa ke shor mein

mere makan ki chhat pe the taer-e-shab Dare Dare

jaise payam-e-marg tha tez hawa ke shor mein

minnat-e-gosh-e-be-hisan kaun uThae ab 'salim'

nauha-e-gham mila diya tez hawa ke shor mein