jaane ko jae fasl-e-gul aane ko aae har baras

jaane ko jaa.e fasl-e-gul aane ko aa.e har baras

ham ġham-zadoñ ke vāste jaise chaman vaise qafas

ruḳhsat huā bīmār-e-ġham bālīñ se uTThe ham-nafas

tadbīr to karte haiñ sab taqdīr par kis kā hai bas

mahshar meñ us bedard se gar pūchh-gachh ne daad kī

aayā huuñ maiñ fariyād ko fariyād sun fariyād-ras

mumkin nahīñ maiñ chhuT sakūñ dām-e-vafā-o-ishq se

bāñdhe ga.e sab dast-o-pā jakḌī ga.ī ek ek nas

qat.a-e-manāzil maiñ karūñ to kis sahāre par karūñ

mafqūd ahl-e-kārvāñ masdūd āvāz-e-jaras

tū aur da.avā ishq kā ye bhī ḳhudā kī shaan hai

mansūr banñe ke liye dil chāhiye ai bul-havas

kahne ko hai saarā jahāñ sachche fidā.ī haiñ kahāñ

das meñ na niklegā koī das laakh meñ nikleñge das

jaa.e bahār aa.e ḳhizāñ is kā taraddud kuchh nahīñ

haiñ lāla-o-gul se sivā mujh ko chaman ke ḳhār-o-ḳhas

tūl-e-ġham-o-āzār ne nāshād mujh ko kar diyā

hai ek ghanTa ek din hai ik mahīna ik baras

kam-baḳht marne ke liye sayyād ke ghar aa.e haiñ

dekheñge ab kyā sair-e-gul chhuT kar asīrān-e-qafas

pahuñche sar-e-arsh-e-barīñ ummīd to aisī nahīñ

hāthoñ hī tak mahdūd hai merī duā kī dastaras

qaabū meñ jab dil hī nahīñ to kyā kahūñ maiñ dard-e-dil

baḌh kar hai teġh-o-tīr se mere liye merā nafas

sau baar de kar jām-o-ḳhum mamnūn saaqī ne kiyā

is kā taqāzā thā ki pī merī guzārish thī ki bas

ai ḳhizr aa.e lutf kyā mashrab alag maslak judā

marne kī hasrat mujh ko hai tum ko hai jiine kī havas

un ke alāva kaun hai mere qarīñ koī nahīñ

yā dahne baa.eñ āfateñ yā ārzūeñ pesh-o-pas

jām-o-subū kā zikr kyā bahtā phire ḳhud mai-kada

ai abr-e-rahmat TuuT kar aisā baras itnā baras

kyā ibtidā kyā intihā jo aa.egā vo jā.egā

duniyā-e-fānī kuchh nahīñ allāh bas baaqī havas

lutf-o-karam se kyā ġharaz qahr-o-sitam se kaam le

barbādī-e-ushshāq par apnī kamar mazbūt kas

kab tak ye sail-e-ashk-e-ġham kab tak ye tūfāñ-ḳheziyāñ

duniyā fanā ho jā.egī ai 'nūh' bas ai 'nūh' bas

jaane ko jae fasl-e-gul aane ko aae har baras

hum gham-zadon ke waste jaise chaman waise qafas

ruKHsat hua bimar-e-gham baalin se uTThe ham-nafas

tadbir to karte hain sab taqdir par kis ka hai bas

mahshar mein us bedard se gar puchh-gachh ne dad ki

aaya hun main fariyaad ko fariyaad sun fariyaad-ras

mumkin nahin main chhuT sakun dam-e-wafa-o-ishq se

bandhe gae sab dast-o-pa jakDi gai ek ek nas

qata-e-manazil main karun to kis sahaare par karun

mafqud ahl-e-karwan masdud aawaz-e-jaras

tu aur dawa ishq ka ye bhi KHuda ki shan hai

mansur banne ke liye dil chahiye ai bul-hawas

kahne ko hai sara jahan sachche fidai hain kahan

das mein na niklega koi das lakh mein niklenge das

jae bahaar aae KHizan is ka taraddud kuchh nahin

hain lala-o-gul se siwa mujh ko chaman ke KHar-o-KHas

tul-e-gham-o-azar ne nashad mujh ko kar diya

hai ek ghanTa ek din hai ek mahina ek baras

kam-baKHt marne ke liye sayyaad ke ghar aae hain

dekhenge ab kya sair-e-gul chhuT kar asiran-e-qafas

pahunche sar-e-arsh-e-barin ummid to aisi nahin

hathon hi tak mahdud hai meri dua ki dastaras

qabu mein jab dil hi nahin to kya kahun main dard-e-dil

baDh kar hai tegh-o-tir se mere liye mera nafas

sau bar de kar jam-o-KHum mamnun saqi ne kiya

is ka taqaza tha ki pi meri guzarish thi ki bas

ai KHizr aae lutf kya mashrab alag maslak juda

marne ki hasrat mujh ko hai tum ko hai jine ki hawas

un ke alawa kaun hai mere qarin koi nahin

ya dahne baen aafaten ya aarzuen pesh-o-pas

jam-o-subu ka zikr kya bahta phire KHud mai-kada

ai abr-e-rahmat TuT kar aisa baras itna baras

kya ibtida kya intiha jo aaega wo jaega

duniya-e-fani kuchh nahin allah bas baqi hawas

lutf-o-karam se kya gharaz qahr-o-sitam se kaam le

barbaadi-e-ushshaq par apni kamar mazbut kas

kab tak ye sail-e-ashk-e-gham kab tak ye tufan-KHeziyan

duniya fana ho jaegi ai 'nuh' bas ai 'nuh' bas