jaane kya baat hai kyun garmi-e-bazar nahin

jaane kyā baat hai kyuuñ garmī-e-bāzār nahīñ

ab koī jins-e-vafā kā bhī ḳharīdār nahīñ

log ik shaḳhs ko le jaate haiñ maqtal kī taraf

is pe ilzām hai utnā ki gunahgār nahīñ

zindagī zaḳhm sahī zaḳhm kā darmāñ kiije

koī is shahr meñ zaḳhmoñ kā ḳharīdār nahīñ

paikar-e-sher meñ Dhal jaa.e kisī kā chehra

mere iz.hār-e-mohabbat kā ye me.aar nahīñ

terī ik nīchī nazar umr kā sarmāya hai

sāqiyā maiñ tire sāġhar kā talabgār nahīñ

yuuñ bhī ham dard ko pahlū meñ chhupā lete haiñ

mujrim-e-shauq haiñ rusvā sar-e-bāzār nahīñ

apnī marzī se yahāñ mujh ko bahā le jaa.e

tez itnī to abhī vaqt kī raftār nahīñ

aap ke dard se rishta hai mire dil kā 'ra.īs'

kaun kahtā hai ki maiñ aap kā ġham-ḳhvār nahīñ

jaane kya baat hai kyun garmi-e-bazar nahin

ab koi jins-e-wafa ka bhi KHaridar nahin

log ek shaKHs ko le jate hain maqtal ki taraf

is pe ilzam hai utna ki gunahgar nahin

zindagi zaKHm sahi zaKHm ka darman kije

koi is shahr mein zaKHmon ka KHaridar nahin

paikar-e-sher mein Dhal jae kisi ka chehra

mere izhaar-e-mohabbat ka ye mear nahin

teri ek nichi nazar umr ka sarmaya hai

saqiya main tere saghar ka talabgar nahin

yun bhi hum dard ko pahlu mein chhupa lete hain

mujrim-e-shauq hain ruswa sar-e-bazar nahin

apni marzi se yahan mujh ko baha le jae

tez itni to abhi waqt ki raftar nahin

aap ke dard se rishta hai mere dil ka 'rais'

kaun kahta hai ki main aap ka gham-KHwar nahin