jaane kya kya main haar baiTha hun

jaane kyā kyā maiñ haar baiThā huuñ

kho ke apnā vaqār baiThā huuñ

milne ā.eñge aaj vo mujh se

is liye be-qarār baiThā huuñ

biphrī maujeñ haiñ phir bhī maiñ yaaro

kar ke dariyā ko paar baiThā huuñ

note-bandī ne aisā maarā hai

saarī daulat maiñ haar baiThā huuñ

aaj tak achchhe din nahīñ aa.e

phir bhī dil tujh pe vaar baiThā huuñ

tū hasīñ hai to kyā huā jānāñ

maiñ bhī sūrat nikhār baiThā huuñ

tujh se milne kī aarzū hai tabhī

raah meñ mere yaar baiThā huuñ

taaki maa.il ho tū bhī merī taraf

le ke maiñ dil meñ pyaar baiThā huuñ

maiñ bhī terī hasīñ nigāhoñ kā

ho ke hamdam shikār baiThā huuñ

maiñ huuñ 'sājid' sunāoge kyā kyā

sun ke bāteñ hazār baiThā huuñ

jaane kya kya main haar baiTha hun

kho ke apna waqar baiTha hun

milne aaenge aaj wo mujh se

is liye be-qarar baiTha hun

biphri maujen hain phir bhi main yaro

kar ke dariya ko par baiTha hun

note-bandi ne aisa mara hai

sari daulat main haar baiTha hun

aaj tak achchhe din nahin aae

phir bhi dil tujh pe war baiTha hun

tu hasin hai to kya hua jaanan

main bhi surat nikhaar baiTha hun

tujh se milne ki aarzu hai tabhi

rah mein mere yar baiTha hun

taki mail ho tu bhi meri taraf

le ke main dil mein pyar baiTha hun

main bhi teri hasin nigahon ka

ho ke hamdam shikar baiTha hun

main hun 'sajid' sunaoge kya kya

sun ke baaten hazar baiTha hun