jaane kyon kar is qadar sahma hua hai aaina

jaane kyoñ kar is qadar sahmā huā hai ā.īna

aa.ine ko dekh kar bhī Dar rahā hai ā.īna

kyā koī mā'sūm sī sūrat nazar meñ aa ga.ī

kyoñ savāloñ meñ ulajh kar rah gayā hai ā.īna

aap apne aap ko is se chhupā sakte nahīñ

aap kī ik ik adā se āshnā hai ā.īna

ḳhvāhishoñ ke jaal meñ uljhā huā hai har bashar

kaun kitnā be-ġharaz hai jāntā hai ā.īna

āshiyāñ merā jalāyā noch Daale par mire

aap ko is haal meñ bhī dekhtā hai ā.īna

is liye sab ne nigāhoñ se girāyā hai use

jis kī jaisī shakl hai vo boltā hai ā.īna

haath meñ patthar liye kyoñ baḌh rahe ho is taraf

choT khā kar ḳhud bhī patthar ban chukā hai ā.īna

zulm kī talvār ke saa.e meñ bhī huuñ sajda rez

'anvarī' har haal meñ pahchāntā hai ā.īna

jaane kyon kar is qadar sahma hua hai aaina

aaine ko dekh kar bhi Dar raha hai aaina

kya koi ma'sum si surat nazar mein aa gai

kyon sawalon mein ulajh kar rah gaya hai aaina

aap apne aap ko is se chhupa sakte nahin

aap ki ek ek ada se aashna hai aaina

KHwahishon ke jal mein uljha hua hai har bashar

kaun kitna be-gharaz hai jaanta hai aaina

aashiyan mera jalaya noch Dale par mere

aap ko is haal mein bhi dekhta hai aaina

is liye sab ne nigahon se giraya hai use

jis ki jaisi shakl hai wo bolta hai aaina

hath mein patthar liye kyon baDh rahe ho is taraf

choT kha kar KHud bhi patthar ban chuka hai aaina

zulm ki talwar ke sae mein bhi hun sajda rez

'anwari' har haal mein pahchanta hai aaina