jaane wo kaun tha aur kis ko sada deta tha

jaane vo kaun thā aur kis ko sadā detā thā

us se bichhḌā hai koī itnā pata detā thā

koī kuchh pūchhe to kahtā ki havā se bachnā

ḳhud bhī Dartā thā bahut sab ko Darā detā thā

us kī āvāz ki be-dāġh sā ā.īna thī

talḳh jumla bhī vo kahtā to maza detā thā

din-bhar ek ek se vo laḌtā-jhagaḌtā bhī bahut

raat ke pichhle-pahar sab ko duā detā thā

vo kisī kā bhī koī nashsha na bujhne detā

dekh letā kahīñ imkāñ to havā detā thā

ik hunar thā ki jise pā ke vo phir kho na sakā

ek ik baat kā ehsās nayā detā thā

jaane bastī kā vo ik moḌ thā kyā us ke liye

shaam Dhalte hī vahāñ sham.a jalā detā thā

ek bhī shaḳhs bahut thā ki ḳhabar rakhtā thā

ek taarā bhī bahut thā ki sadā detā thā

ruḳh havā kā koī jab pūchhtā us se 'bānī'

muTThī-bhar ḳhaak ḳhalā meñ vo uḌā detā thā

jaane wo kaun tha aur kis ko sada deta tha

us se bichhDa hai koi itna pata deta tha

koi kuchh puchhe to kahta ki hawa se bachna

KHud bhi Darta tha bahut sab ko Dara deta tha

us ki aawaz ki be-dagh sa aaina thi

talKH jumla bhi wo kahta to maza deta tha

din-bhar ek ek se wo laDta-jhagaDta bhi bahut

raat ke pichhle-pahar sab ko dua deta tha

wo kisi ka bhi koi nashsha na bujhne deta

dekh leta kahin imkan to hawa deta tha

ek hunar tha ki jise pa ke wo phir kho na saka

ek ek baat ka ehsas naya deta tha

jaane basti ka wo ek moD tha kya us ke liye

sham Dhalte hi wahan shama jala deta tha

ek bhi shaKHs bahut tha ki KHabar rakhta tha

ek tara bhi bahut tha ki sada deta tha

ruKH hawa ka koi jab puchhta us se 'bani'

muTThi-bhar KHak KHala mein wo uDa deta tha