jab apne etiqad ke mehwar se haT gaya

jab apne e'tiqād ke mehvar se haT gayā

maiñ reza reza ho ke harīfoñ meñ baT gayā

dushman ke tan pe gaaḌ diyā maiñ ne apnā sar

maidān-e-kār-zār kā pāñsa palaT gayā

thoḌī sī aur zaḳhm ko gahrā.ī mil ga.ī

thoḌā sā aur dard kā ehsās ghaT gayā

darpesh ab nahīñ tirā ġham kaise maan luuñ

kaisā thā vo pahāḌ jo raste se haT gayā

apne qarīb pā ke mo.attar sī āhaTeñ

maiñ bār-hā sanaktī havā se lipaT gayā

jo bhī milā safar meñ kisī peḌ ke tale

aaseb ban ke mujh se vo saayā chimaT gayā

luTte hue avaam ke ghar-bār dekh kar

ai shahryār terā kaleja na phaT gayā

rakkhegā ḳhaak rabt vo is kā.enāt se

jo zarra apnī zaat ke andar simaT gayā

choroñ kā ehtisāb na ab tak huā 'qatīl'

jo haath be-qusūr thā vo haath kaT gayā

jab apne e'tiqad ke mehwar se haT gaya

main reza reza ho ke harifon mein baT gaya

dushman ke tan pe gaD diya main ne apna sar

maidan-e-kar-zar ka pansa palaT gaya

thoDi si aur zaKHm ko gahrai mil gai

thoDa sa aur dard ka ehsas ghaT gaya

darpesh ab nahin tera gham kaise man lun

kaisa tha wo pahaD jo raste se haT gaya

apne qarib pa ke moattar si aahaTen

main bar-ha sanakti hawa se lipaT gaya

jo bhi mila safar mein kisi peD ke tale

aaseb ban ke mujh se wo saya chimaT gaya

luTte hue awam ke ghar-bar dekh kar

ai shahryar tera kaleja na phaT gaya

rakkhega KHak rabt wo is kaenat se

jo zarra apni zat ke andar simaT gaya

choron ka ehtisab na ab tak hua 'qatil'

jo hath be-qusur tha wo hath kaT gaya