jab ba-taqrib-e-safar yar ne mahmil bandha

jab ba-taqrīb-e-safar yaar ne mahmil bāñdhā

tapish-e-shauq ne har zarre pe ik dil bāñdhā

ahl-e-bīnash ne ba-hairat-kada-e-shoḳhi-e-nāz

jauhar-e-ā.ina ko tūti-e-bismil bāñdhā

yaas o ummīd ne yak-arbada maidāñ māñgā

ijz-e-himmat ne tilism-e-dil-e-sā.il bāñdhā

na bañdhe tishnagi-e-zauq ke mazmūñ 'ġhālib'

garche dil khol ke dariyā ko bhī sāhil bāñdhā

istilāhāt-e-asīrān-e-taġhāful mat pūchh

jo girah aap na kholī use mushkil bāñdhā

yaar ne tishnagī-e-shauq ke mazmūñ chāhe

ham ne dil khol ke dariyā ko bhī sāhil bāñdhā

tapish-e-ā.īna parvāz-e-tamannā laa.ī

nāma-e-shauq ba-hāl-e-dil-e-bismil bāñdhā

diida tā-dil hai yak-ā.īna charāġhāñ kis ne

ḳhalvat-e-nāz pe pairāya-e-mahfil bāñdhā

nā-umīdī ne ba-taqrīb-e-mazāmīn-e-ḳhumār

kūcha-e-mauj ko ḳhamyāza-e-sāhil bāñdhā

mutrib-e-dil ne mire tār-e-nafas se 'ġhālib'

saaz par rishta pa.e naġhma-e-'bedil' bāñdhā

nā-tavānī hai tamāshā.ī-e-umr-e-rafta

rang ne aa.ina āñkhoñ ke muqābil bāñdhā

nok-e-har-ḳhār se thā bas-ki sar-e-duzdī-e-zaḳhm

chuuñ namad ham ne kaf-e-pā pe 'asad' dil bāñdhā

jab ba-taqrib-e-safar yar ne mahmil bandha

tapish-e-shauq ne har zarre pe ek dil bandha

ahl-e-binash ne ba-hairat-kada-e-shoKHi-e-naz

jauhar-e-aina ko tuti-e-bismil bandha

yas o ummid ne yak-arbada maidan manga

ijz-e-himmat ne tilism-e-dil-e-sail bandha

na bandhe tishnagi-e-zauq ke mazmun 'ghaalib'

garche dil khol ke dariya ko bhi sahil bandha

istilahat-e-asiran-e-taghaful mat puchh

jo girah aap na kholi use mushkil bandha

yar ne tishnagi-e-shauq ke mazmun chahe

hum ne dil khol ke dariya ko bhi sahil bandha

tapish-e-aina parwaz-e-tamanna lai

nama-e-shauq ba-haal-e-dil-e-bismil bandha

dida ta-dil hai yak-aina charaghan kis ne

KHalwat-e-naz pe pairaya-e-mahfil bandha

na-umidi ne ba-taqrib-e-mazamin-e-KHumar

kucha-e-mauj ko KHamyaza-e-sahil bandha

mutrib-e-dil ne mere tar-e-nafas se 'ghaalib'

saz par rishta pae naghma-e-'bedil' bandha

na-tawani hai tamashai-e-umr-e-rafta

rang ne aaina aankhon ke muqabil bandha

nok-e-har-KHar se tha bas-ki sar-e-duzdi-e-zaKHm

chun namad hum ne kaf-e-pa pe 'asad' dil bandha