jab barq-pash jalwa-e-jaanana ban gaya

jab barq-pāsh jalva-e-jānāna ban gayā

farzāna thā vahī ki jo dīvāna ban gayā

shauq-e-numūd ne use rakkhā na arsh par

ka.aba kahīñ banā kahīñ but-ḳhāna ban gayā

uftād ga.ī qalb kā allāh re uruuj

mahfil meñ us kī TuuT ke paimāna ban gayā

takmīl-e-ishq husn ko betāb kar ga.ī

ḳhud sāz-e-sham.a sozish-e-parvāna ban gayā

is dil ne itnī kī hai yagānoñ kī justujū

apnī nazar meñ aap hī begāna ban gayā

tasvīr-e-intizār banā shauq-e-dil to kyā

kambaḳht us kā va.ada-e-īfā na ban gayā

hangāma-e-nuzūl tamannā-e-dil na pūchh

ābād ho ke nāzish-e-vīrāna ban gayā

jo naala aaj tak na huā lab se āshnā

duniyā meñ kyoñ 'munīr' vo afsāna ban gayā

jab barq-pash jalwa-e-jaanana ban gaya

farzana tha wahi ki jo diwana ban gaya

shauq-e-numud ne use rakkha na arsh par

kaba kahin bana kahin but-KHana ban gaya

uftad gai qalb ka allah re uruj

mahfil mein us ki TuT ke paimana ban gaya

takmil-e-ishq husn ko betab kar gai

KHud saz-e-shama sozish-e-parwana ban gaya

is dil ne itni ki hai yaganon ki justuju

apni nazar mein aap hi begana ban gaya

taswir-e-intizar bana shauq-e-dil to kya

kambaKHt us ka wada-e-ifa na ban gaya

hangama-e-nuzul tamanna-e-dil na puchh

aabaad ho ke nazish-e-virana ban gaya

jo nala aaj tak na hua lab se aashna

duniya mein kyon 'munir' wo afsana ban gaya