jab bhi mujhko apna bachpan yaad aata hai

jab bhī mujh ko apnā bachpan yaad aatā hai

bachpan ke ik pyaar kā bachpan yaad aatā hai

dekh ke is muñh-zor javānī kī muñh-zorī

mujh ko is kā totlā bachpan yaad aatā hai

aurat maañ thī bahan thī daadī thī naanī thī

kore kāġhaz jaisā bachpan yaad aatā hai

tūfānī bārish ghar meñ sailāb kā aalam

ThanDā chūlhā bhūkā bachpan yaad aatā hai

tanhā.ī kā dukh to kam ho kisī bahāne

dekheñ kis kā kis kā bachpan yaad aatā hai

shahd ke jaisī mīThī bolī yaad aatī hai

duudh ke jaisā ujlā bachpan yaad aatā hai

bachpan ke yāroñ se miltā rahtā huuñ maiñ

'qaisar' mujh ko sab kā bachpan yaad aatā hai

jab bhi mujh ko apna bachpan yaad aata hai

bachpan ke ek pyar ka bachpan yaad aata hai

dekh ke is munh-zor jawani ki munh-zori

mujh ko is ka totla bachpan yaad aata hai

aurat man thi bahan thi dadi thi nani thi

kore kaghaz jaisa bachpan yaad aata hai

tufani barish ghar mein sailab ka aalam

ThanDa chulha bhuka bachpan yaad aata hai

tanhai ka dukh to kam ho kisi bahane

dekhen kis ka kis ka bachpan yaad aata hai

shahd ke jaisi miThi boli yaad aati hai

dudh ke jaisa ujla bachpan yaad aata hai

bachpan ke yaron se milta rahta hun main

'qaisar' mujh ko sab ka bachpan yaad aata hai