jab bhi saman-e-sukun-e-dil-o-jaan hone laga

jab bhī sāmān-e-sukūn-e-dil-o-jāñ hone lagā

choT khaa.ī thī kabhī is kā gumāñ hone lagā

ab tirī anjuman-e-nāz koī raaz nahīñ

ab mirā dard bhī lafzoñ meñ bayāñ hone lagā

ziist kyā chiiz hai koī bhī na pahchān sakā

surḳh-rū kaun huā kis kā ziyāñ hone lagā

sho.ala-e-gul ne liyā dāman-e-gulchīñ se ḳhirāj

ḳhud bahāroñ ko bhī ehsās-e-ḳhizāñ hone lagā

chāragar chāk-garebāñ kī ḳhabar lene lage

aam phir shikva-e-bedād-garāñ hone lagā

vaqt ke saath to ehsās bhī miT jaatā hai

kis ko ma.alūm ki ab dard kahāñ hone lagā

kisī tūfān kī aamad hai ḳhudā ḳhair kare

mehrbāñ ham pe jo vo dushman-e-jāñ hone lagā

jab bhi saman-e-sukun-e-dil-o-jaan hone laga

choT khai thi kabhi is ka guman hone laga

ab teri anjuman-e-naz koi raaz nahin

ab mera dard bhi lafzon mein bayan hone laga

zist kya chiz hai koi bhi na pahchan saka

surKH-ru kaun hua kis ka ziyan hone laga

shoala-e-gul ne liya daman-e-gulchin se KHiraj

KHud bahaaron ko bhi ehsas-e-KHizan hone laga

chaaragar chaak-gareban ki KHabar lene lage

aam phir shikwa-e-bedad-garan hone laga

waqt ke sath to ehsas bhi miT jata hai

kis ko malum ki ab dard kahan hone laga

kisi tufan ki aamad hai KHuda KHair kare

mehrban hum pe jo wo dushman-e-jaan hone laga