jab bhi tanhai kabhi hoti hai hasil mujhko

jab bhī tanhā.ī kabhī hotī hai hāsil mujh ko

vaqt rakh detā hai mere hī muqābil mujh ko

āḳhirī umr kī uftād ga.ī tab.a kī ḳhair

raas aatā hai alam-zār na mahfil mujh ko

ek baar aur maiñ jī pā.ūñ to shāyad hal hoñ

zindagānī ne diye aise masā.il mujh ko

ishq itnā bhī hai kaafī ki tujhe chāhtā huuñ

itnā hāsil hai to kyā kuchh nahīñ hāsil mujh ko

jab bahār aa.ī tavānā.ī bhī vāpas aa.ī

qaid meñ rakh na sake band-o-salāsil mujh ko

itnī ūñchā.ī se to merī zabūñ-hālī dekh

jitnī duurī se nazar aatā hai sāhil mujh ko

mujh ko ma.azūr banātī hai mirī kam-yābī

nazar aatā hai ḳharīdār na saa.il mujh ko

maiñ tire lutf se nādim huuñ magar arz hai ye

ab samundar se banānā nahīñ sāhil mujh ko

maiñ ne kashkol jo hāthoñ meñ liyā to 'ābid'

saarī duniyā nazar aane lagī saa.il mujh ko

jab bhi tanhai kabhi hoti hai hasil mujh ko

waqt rakh deta hai mere hi muqabil mujh ko

aaKHiri umr ki uftad gai taba ki KHair

ras aata hai alam-zar na mahfil mujh ko

ek bar aur main ji paun to shayad hal hon

zindagani ne diye aise masail mujh ko

ishq itna bhi hai kafi ki tujhe chahta hun

itna hasil hai to kya kuchh nahin hasil mujh ko

jab bahaar aai tawanai bhi wapas aai

qaid mein rakh na sake band-o-salasil mujh ko

itni unchai se to meri zabun-haali dekh

jitni duri se nazar aata hai sahil mujh ko

mujh ko mazur banati hai meri kam-yabi

nazar aata hai KHaridar na sail mujh ko

main tere lutf se nadim hun magar arz hai ye

ab samundar se banana nahin sahil mujh ko

main ne kashkol jo hathon mein liya to 'abid'

sari duniya nazar aane lagi sail mujh ko