jab bhi teri qurbat ke kuchh imkan nazar aae

jab bhī tirī qurbat ke kuchh imkāñ nazar aa.e

ham ḳhush hue itne ki pareshāñ nazar aa.e

dekhūñ to har ik husn meñ jhalkeñ tire andāz

sochūñ to faqat gardish-e-daurāñ nazar aa.e

TuuTā jo fusūn-e-nigah-e-shauq to dekhā

sahrā the jo nashshe meñ gulistāñ nazar aa.e

kāñToñ ke diloñ meñ bhī vahī zaḳhm the lekin

phūloñ ne sajā.e to numāyāñ nazar aa.e

ik ashk bhī nazr-e-ġham-e-jānāñ ko nahīñ paas

ham aaj bahut be-sar-o-sāmāñ nazar aa.e

jo rāh-e-tamannā ke har ik moḌ pe chup the

jab daar pe pahuñche to ġhazal-ḳhvāñ nazar aa.e

kyā jāniye kyā ho gayā arbāb-e-nazar ko

jis shahr ko dekheñ vahī vīrāñ nazar aa.e

kyā ruup nigāhoñ meñ rachā baiThe ki in ko

gulshan nazar aa.e na bayābāñ nazar aa.e

ik umr se is moḌ pe baiThe haiñ jahāñ par

ik pal kā guzarnā bhī na āsāñ nazar aa.e

'sādiq' kī nigāhoñ ko hī Thahrāv na mujrim

ā.īne har ik daur meñ hairāñ nazar aa.e

jab bhi teri qurbat ke kuchh imkan nazar aae

hum KHush hue itne ki pareshan nazar aae

dekhun to har ek husn mein jhalken tere andaz

sochun to faqat gardish-e-dauran nazar aae

TuTa jo fusun-e-nigah-e-shauq to dekha

sahra the jo nashshe mein gulistan nazar aae

kanTon ke dilon mein bhi wahi zaKHm the lekin

phulon ne sajae to numayan nazar aae

ek ashk bhi nazr-e-gham-e-jaanan ko nahin pas

hum aaj bahut be-sar-o-saman nazar aae

jo rah-e-tamanna ke har ek moD pe chup the

jab dar pe pahunche to ghazal-KHwan nazar aae

kya jaaniye kya ho gaya arbab-e-nazar ko

jis shahr ko dekhen wahi viran nazar aae

kya rup nigahon mein racha baiThe ki in ko

gulshan nazar aae na bayaban nazar aae

ek umr se is moD pe baiThe hain jahan par

ek pal ka guzarna bhi na aasan nazar aae

'sadiq' ki nigahon ko hi Thahraw na mujrim

aaine har ek daur mein hairan nazar aae