jab dard mohabbat ka mere pas nahin tha

jab dard mohabbat kā mire paas nahīñ thā

maiñ kaun huuñ kyā huuñ mujhe ehsās nahīñ thā

TuuTā mirā har ḳhvāb huā jab se judā vo

itnā to kabhī dil mirā be-ās nahīñ thā

aayā jo mire paas mire hoñT bhigone

vo ret kā dariyā thā mirī pyaas nahīñ thā

baiThā huuñ maiñ tanhā.ī ko siine se lagā ke

is haal meñ jiinā to mujhe raas nahīñ thā

kab jaan sakā dard mirā dekhne vaalā

chehra mire hālāt kā akkās nahīñ thā

kyuuñ zahr banā us kā tabassum mere haq meñ

ai 'naqsh' vo ik dost thā almās nahīñ thā

jab dard mohabbat ka mere pas nahin tha

main kaun hun kya hun mujhe ehsas nahin tha

TuTa mera har KHwab hua jab se juda wo

itna to kabhi dil mera be-as nahin tha

aaya jo mere pas mere honT bhigone

wo ret ka dariya tha meri pyas nahin tha

baiTha hun main tanhai ko sine se laga ke

is haal mein jina to mujhe ras nahin tha

kab jaan saka dard mera dekhne wala

chehra mere haalat ka akkas nahin tha

kyun zahr bana us ka tabassum mere haq mein

ai 'naqsh' wo ek dost tha almas nahin tha