jab fasl-e-bahaaran aati hai shadab gulistan hote hain

jab fasl-e-bahārāñ aatī hai shādāb gulistāñ hote haiñ

takmīl-e-junūñ bhī hotī hai aur chaak garebāñ hote haiñ

pur-kaif fazā.eñ chaltī haiñ maḳhmūr ghaTā.eñ chhātī haiñ

jab sehn-e-chaman meñ jalva-numā vo jān-e-bahārāñ hote haiñ

hotā hai sukūn-e-qalb-o-jigar har zaḳhm meñ lazzat aatī hai

o nāvak-afgan tiir tire taskīn-e-rag-e-jāñ hote haiñ

kyuuñ minnat-e-chāra-gar kiije kyuuñ fikr-e-davā-e-dil kiije

bīmār-e-mohabbat ke naale ḳhud dard kā darmāñ hote haiñ

ye ahd-e-javānī shoḳhī-e-gul do din kī bahāreñ hotī haiñ

dekheñ to kabhī vo rañg-e-ḳhizāñ jo husn pe nāzāñ hote haiñ

jab bād-e-bahārī aatī hai har gul pe javānī chhātī hai

khil jaate haiñ mire zaḳhm-e-jigar aur daaġh daraḳhshāñ hote haiñ

girdāb muhāfiz hotā hai ai bahr-e-havādis bekas kā

khiñch aatā hai sāhil maujoñ meñ jab josh pe tūfāñ hote haiñ

kyā mujh ko zarūrat ai 'anvar' kyuuñ un ke sitam kā shākī huuñ

jab yaad jafā.eñ aatī haiñ vo ḳhud hī pashemāñ hote haiñ

jab fasl-e-bahaaran aati hai shadab gulistan hote hain

takmil-e-junun bhi hoti hai aur chaak gareban hote hain

pur-kaif fazaen chalti hain maKHmur ghaTaen chhati hain

jab sehn-e-chaman mein jalwa-numa wo jaan-e-bahaaran hote hain

hota hai sukun-e-qalb-o-jigar har zaKHm mein lazzat aati hai

o nawak-afgan tir tere taskin-e-rag-e-jaan hote hain

kyun minnat-e-chaara-gar kije kyun fikr-e-dawa-e-dil kije

bimar-e-mohabbat ke nale KHud dard ka darman hote hain

ye ahd-e-jawani shoKHi-e-gul do din ki bahaaren hoti hain

dekhen to kabhi wo rang-e-KHizan jo husn pe nazan hote hain

jab baad-e-bahaari aati hai har gul pe jawani chhati hai

khil jate hain mere zaKHm-e-jigar aur dagh daraKHshan hote hain

girdab muhafiz hota hai ai bahr-e-hawadis bekas ka

khinch aata hai sahil maujon mein jab josh pe tufan hote hain

kya mujh ko zarurat ai 'anwar' kyun un ke sitam ka shaki hun

jab yaad jafaen aati hain wo KHud hi pasheman hote hain