jab hai miTna hi to andaz hakimana sahi

jab hai miTnā hī to andāz hakīmāna sahī

ḳhalvat-e-ġham ke evaz gosha-e-mai-ḳhāna sahī

raunaq-e-bāda-kashī jur.at-e-rindāna sahī

ḳhaar honā hai to mai-ḳhāna-ba-mai-ḳhāna sahī

ishq ik qatre meñ dariyā ko samo detā hai

aql ko dīvāna samajhtī hai to dīvāna sahī

mere dil meñ bhī tajallī ke ḳhazīne haiñ nihāñ

māh-o-ḳhurshīd meñ aks-e-ruḳh-e-jānāna sahī

fursat-e-shauq ġhanīmat hai uThā bhī sāġhar

zindagī ek chhalaktā huā paimāna sahī

kyā ḳhabar thī ki mai-e-nāb meñ itnā hai surūr

ab jo pī lī hai to ik aur bhī paimāna sahī

merī vārafta-nigāhī kī bhī kuchh qīmat hai

bazm kī bazm ruḳh-e-yār kā parvāna sahī

fikr-o-ehsās meñ poshīda haiñ asrār-e-hayāt

bāl-o-par quvvat-e-parvāz se begāna sahī

yahī kyā kam hai ki barbād-e-mohabbat hai 'ra.īs'

tere altāf-o-ināyāt se begāna sahī

jab hai miTna hi to andaz hakimana sahi

KHalwat-e-gham ke ewaz gosha-e-mai-KHana sahi

raunaq-e-baada-kashi jurat-e-rindana sahi

KHar hona hai to mai-KHana-ba-mai-KHana sahi

ishq ek qatre mein dariya ko samo deta hai

aql ko diwana samajhti hai to diwana sahi

mere dil mein bhi tajalli ke KHazine hain nihan

mah-o-KHurshid mein aks-e-ruKH-e-jaanana sahi

fursat-e-shauq ghanimat hai uTha bhi saghar

zindagi ek chhalakta hua paimana sahi

kya KHabar thi ki mai-e-nab mein itna hai surur

ab jo pi li hai to ek aur bhi paimana sahi

meri warafta-nigahi ki bhi kuchh qimat hai

bazm ki bazm ruKH-e-yar ka parwana sahi

fikr-o-ehsas mein poshida hain asrar-e-hayat

baal-o-par quwwat-e-parwaz se begana sahi

yahi kya kam hai ki barbaad-e-mohabbat hai 'rais'

tere altaf-o-inayat se begana sahi