jab hum hudud-e-dair-o-haram se guzar gae

jab ham hudūd-e-dair-o-haram se guzar ga.e

har samt un kā jalva 'ayāñ thā jidhar ga.e

is tarah vo nigāh-e-karam aaj kar ga.e

dil ko surūr-e-bāda-e-ulfat se bhar ga.e

vo ham ko apne dil ke hī andar nihāñ milā

jis kī talāsh karte hue dar-ba-dar ga.e

kuchh ahl-e-zarf dekhte haiñ us ke nuur ko

mahrūm dīdiyoñ ko bahut dīda-var ga.e

dil le gayā hameñ phir usī bevafā ke paas

jaanā nahīñ thā ham ko jahāñ ham magar ga.e

vo aa ga.e to jal uThe ummīd ke charāġh

vo hans diye to bazm meñ motī bikhar ga.e

āñkhoñ meñ ashk-e-ġham liye ham vaqt-e-alvidā'

nazroñ se un ke saath tā-hadd-e-nazar ga.e

dekhā hameñ to garm-nigāhī pighal ga.ī

mizhgāñ ke tiir bhauñ kī kamāñ se utar ga.e

un ke mazīd vā'doñ pe kaise yaqīn ho

ab tak jo vā'da kar ke barābar makr ga.e

ye aur baat phir gayā paanī umiid par

ham un kī bazm meñ kisī ummīd par ga.e

phir us ko purshish-e-ġham-e-ulfat se fā.eda

ghuT ghuT ke jis ke siine meñ armān mar ga.e

ai 'mauj' merī kashtī-e-ulfat vahīñ rahī

tūfān mere chāroñ taraf se guzar ga.e

jab hum hudud-e-dair-o-haram se guzar gae

har samt un ka jalwa 'ayan tha jidhar gae

is tarah wo nigah-e-karam aaj kar gae

dil ko surur-e-baada-e-ulfat se bhar gae

wo hum ko apne dil ke hi andar nihan mila

jis ki talash karte hue dar-ba-dar gae

kuchh ahl-e-zarf dekhte hain us ke nur ko

mahrum didiyon ko bahut dida-war gae

dil le gaya hamein phir usi bewafa ke pas

jaana nahin tha hum ko jahan hum magar gae

wo aa gae to jal uThe ummid ke charagh

wo hans diye to bazm mein moti bikhar gae

aankhon mein ashk-e-gham liye hum waqt-e-alwida'

nazron se un ke sath ta-hadd-e-nazar gae

dekha hamein to garm-nigahi pighal gai

mizhgan ke tir bhaun ki kaman se utar gae

un ke mazid wa'don pe kaise yaqin ho

ab tak jo wa'da kar ke barabar makr gae

ye aur baat phir gaya pani umid par

hum un ki bazm mein kisi ummid par gae

phir us ko purshish-e-gham-e-ulfat se faeda

ghuT ghuT ke jis ke sine mein arman mar gae

ai 'mauj' meri kashti-e-ulfat wahin rahi

tufan mere chaaron taraf se guzar gae