jab har ek shahr balaon ka Thikana ban jae

jab har ik shahr balāoñ kā Thikāna ban jaa.e

kyā ḳhabar kaun kahāñ kis kā nishāna ban jaa.e

ishq ḳhud apne raqīboñ ko baham kartā hai

ham jise pyaar kareñ jān-e-zamāna ban jaa.e

itnī shiddat se na mil tū ki judā.ī chāheñ

yahī qurbat tirī duurī kā bahāna ban jaa.e

jo ġhazal aaj tire hijr meñ likkhī hai vo kal

kyā ḳhabar ahl-e-mohabbat kā tarāna ban jaa.e

kartā rahtā huuñ farāham maiñ zar-e-zaḳhm ki yuuñ

shāyad ā.inda zamānoñ kā ḳhazāna ban jaa.e

is se baḌh kar koī in.ām-e-hunar kyā hai 'farāz'

apne hī ahd meñ ik shaḳhs fasāna ban jaa.e

jab har ek shahr balaon ka Thikana ban jae

kya KHabar kaun kahan kis ka nishana ban jae

ishq KHud apne raqibon ko baham karta hai

hum jise pyar karen jaan-e-zamana ban jae

itni shiddat se na mil tu ki judai chahen

yahi qurbat teri duri ka bahana ban jae

jo ghazal aaj tere hijr mein likkhi hai wo kal

kya KHabar ahl-e-mohabbat ka tarana ban jae

karta rahta hun faraham main zar-e-zaKHm ki yun

shayad aainda zamanon ka KHazana ban jae

is se baDh kar koi inam-e-hunar kya hai 'faraaz'

apne hi ahd mein ek shaKHs fasana ban jae