jab hijr ke shahr mein dhup utri main jag paDa to KHwab hua

jab hijr ke shahr meñ dhuup utrī maiñ jaag paḌā to ḳhvāb huā

mirī soch ḳhizāñ kī shāḳh banī tirā chehra aur gulāb huā

barfīlī rut kī tez havā kyuuñ jhiil meñ kañkar pheñk ga.ī

ik aañkh kī niiñd harām huī ik chāñd kā aks ḳharāb huā

tire hijr meñ zehn pighaltā thā tire qurb meñ āñkheñ jaltī haiñ

tujhe khonā ek qayāmat thā tirā milnā aur azaab huā

bhare shahr meñ ek hī chehra thā jise aaj bhī galiyāñ DhūñDtī haiñ

kisī sub.h usī kī dhuup khilī kisī raat vahī mahtāb huā

baḌī umr ke ba.ad in āñkhoñ meñ koī abr utrā tirī yādoñ kā

mire dil kī zamīñ ābād huī mire ġham kā nagar shādāb huā

kabhī vasl meñ 'mohsin' dil TuuTā kabhī hijr kī rut ne laaj rakhī

kisī jism meñ āñkheñ kho baiThe koī chehra khulī kitāb huā

jab hijr ke shahr mein dhup utri main jag paDa to KHwab hua

meri soch KHizan ki shaKH bani tera chehra aur gulab hua

barfili rut ki tez hawa kyun jhil mein kankar phenk gai

ek aankh ki nind haram hui ek chand ka aks KHarab hua

tere hijr mein zehn pighalta tha tere qurb mein aankhen jalti hain

tujhe khona ek qayamat tha tera milna aur azab hua

bhare shahr mein ek hi chehra tha jise aaj bhi galiyan DhunDti hain

kisi subh usi ki dhup khili kisi raat wahi mahtab hua

baDi umr ke baad in aankhon mein koi abr utra teri yaadon ka

mere dil ki zamin aabaad hui mere gham ka nagar shadab hua

kabhi wasl mein 'mohsin' dil TuTa kabhi hijr ki rut ne laj rakhi

kisi jism mein aankhen kho baiThe koi chehra khuli kitab hua