jab jab teri aankh se Tapka aansu shabnam roi hai

jab jab terī aañkh se Tapkā aañsū shabnam roī hai

jaise sham.a jalī hai shab bhar thak ke sub.h ko soī hai

jo bo.oge vo kāTo.ge qudrat kā qānūn hai ye

ham to kīkar kaaT rahe haiñ kaisī fasl ye boī hai

ḳhuun ke dariyā tair ke ham ne āzādī hāsil kī thī

par sāhil pe pahuñch ke ham ne ḳhud hī naav Duboī hai

mazlūmoñ ne pāmāloñ ne zulm sahe haiñ sadiyoñ se

har ik daur meñ un logoñ ne bas suulī hī Dhoī hai

raste raste ḳhaar bichhe haiñ manzil manzil sho.ale haiñ

dil kī raah pe chal kar ham ne apnī hastī khoī hai

'bismil' umr gañvā.ī sach par īmāñ par qurbān hue

jab insāf kī aas lagā.ī tab tab aañkh bhigoī hai

jab jab teri aankh se Tapka aansu shabnam roi hai

jaise shama jali hai shab bhar thak ke subh ko soi hai

jo booge wo kaToge qudrat ka qanun hai ye

hum to kikar kaT rahe hain kaisi fasl ye boi hai

KHun ke dariya tair ke hum ne aazadi hasil ki thi

par sahil pe pahunch ke hum ne KHud hi naw Duboi hai

mazlumon ne pamalon ne zulm sahe hain sadiyon se

har ek daur mein un logon ne bas suli hi Dhoi hai

raste raste KHar bichhe hain manzil manzil shoale hain

dil ki rah pe chal kar hum ne apni hasti khoi hai

'bismil' umr ganwai sach par iman par qurban hue

jab insaf ki aas lagai tab tab aankh bhigoi hai