jab jahan mein peT sab ka hi hai bharti roTi

jab jahāñ meñ peT sab kā hī hai bhartī roTī

muñh chiḌātī roz-o-shab phir kyoñ mirā hī roTī

roz chūlhe meñ jalātā hai jo ḳhud-dārī ko

bhuuk phir us kī miTā.e kaise us kī roTī

umr itnī thī ki roTī maañ ke hāthoñ khātā

mujh ko to us umr meñ khāne lagī thī roTī

nāchtī hai bhuuk jab bhī chaar din āñgan meñ

tab lahū kī mere qīmat sirf lagtī roTī

jis ne auroñ ke ḳhazāne zindagī bhar the bhare

marte marte vo bhī chillāyā thā roTī roTī

ḳhuun us kā khet meñ bahtā hai jaise paanī

bantī hai jis ke pasīne se sabhī kī roTī

log to karte haiñ īmāñ kā bhī saudā aksar

daañv pe lagtī hai jab un kī ye pyārī roTī

daur-e-ġhurbat meñ bhī kartā hai 'shafaq' ye da.avā

mar bhī jaa.e to na khaa.e shā.irī kī roTī

jab jahan mein peT sab ka hi hai bharti roTi

munh chiDati roz-o-shab phir kyon mera hi roTi

roz chulhe mein jalata hai jo KHud-dari ko

bhuk phir us ki miTae kaise us ki roTi

umr itni thi ki roTi man ke hathon khata

mujh ko to us umr mein khane lagi thi roTi

nachti hai bhuk jab bhi chaar din aangan mein

tab lahu ki mere qimat sirf lagti roTi

jis ne auron ke KHazane zindagi bhar the bhare

marte marte wo bhi chillaya tha roTi roTi

KHun us ka khet mein bahta hai jaise pani

banti hai jis ke pasine se sabhi ki roTi

log to karte hain iman ka bhi sauda aksar

danw pe lagti hai jab un ki ye pyari roTi

daur-e-ghurbat mein bhi karta hai 'shafaq' ye dawa

mar bhi jae to na khae shairi ki roTi