jab kabhi hum tere kuche se guzar jate hain

jab kabhī ham tire kūche se guzar jaate haiñ

lauh-e-idrāk pe kuchh aur ubhar jaate haiñ

husn se lījiye tanzīm-e-do-ālam kā sabaq

sub.h hotī hai to gesū bhī sañvar jaate haiñ

ham ne paayā hai mohabbat kā ḳhumār-e-abadī

kaise hote haiñ vo nashshe ki utar jaate haiñ

itne ḳhā.if haiñ mai-o-mah se janāb-e-vā.iz

nām-e-kausar bhī jo sunte haiñ to Dar jaate haiñ

mai-kada band muqaffal haiñ dar-e-dair-o-haram

dekhnā hai ki 'shakīl' aaj kidhar jaate haiñ

jab kabhi hum tere kuche se guzar jate hain

lauh-e-idrak pe kuchh aur ubhar jate hain

husn se lijiye tanzim-e-do-alam ka sabaq

subh hoti hai to gesu bhi sanwar jate hain

hum ne paya hai mohabbat ka KHumar-e-abadi

kaise hote hain wo nashshe ki utar jate hain

itne KHaif hain mai-o-mah se janab-e-waiz

nam-e-kausar bhi jo sunte hain to Dar jate hain

mai-kada band muqaffal hain dar-e-dair-o-haram

dekhna hai ki 'shakil' aaj kidhar jate hain