jab kabhi KHubi-e-qismat se tujhe dekhte hain

jab kabhī ḳhūbī-e-qismat se tujhe dekhte haiñ

ā.ina-ḳhāne kī hairat se tujhe dekhte haiñ

vo jo pāmāl-e-zamāna haiñ mire taḳht-nashīñ

dekh to kaisī mohabbat se tujhe dekhte haiñ

kāsa-e-dīd meñ bas ek jhalak kā sikka

ham faqīroñ kī qanā'at se tujhe dekhte haiñ

tere jaane kā ḳhayāl aatā hai ghar se jis dam

dar-o-dīvār kī hasrat se tujhe dekhte haiñ

tere kūche meñ chale jaate haiñ qāsid ban kar

aur aksar usī sūrat se tujhe dekhte haiñ

kah ga.ī bād-e-sabā aaj tire kaan meñ kyā

phuul kis darja sharārat se tujhe dekhte haiñ

tujh ko kyā 'ilm tujhe hārne vaale kuchh log

kis qadar saḳht nadāmat se tujhe dekhte haiñ

jab kabhi KHubi-e-qismat se tujhe dekhte hain

aaina-KHane ki hairat se tujhe dekhte hain

wo jo pamal-e-zamana hain mere taKHt-nashin

dekh to kaisi mohabbat se tujhe dekhte hain

kasa-e-did mein bas ek jhalak ka sikka

hum faqiron ki qana'at se tujhe dekhte hain

tere jaane ka KHayal aata hai ghar se jis dam

dar-o-diwar ki hasrat se tujhe dekhte hain

tere kuche mein chale jate hain qasid ban kar

aur aksar usi surat se tujhe dekhte hain

kah gai baad-e-saba aaj tere kan mein kya

phul kis darja shararat se tujhe dekhte hain

tujh ko kya 'ilm tujhe haarne wale kuchh log

kis qadar saKHt nadamat se tujhe dekhte hain