جب خیریت سے رات اندھیری گزر گئی

جب خیریت سے رات اندھیری گزر گئی

چہرے پہ میرے صبح کی لالی بکھر گئی

باندھا ہوا ہے خود کو سمندر نے اس قدر

ہر موج سر پٹک کے ادھر سے ادھر گئی

پل بھر کی خوش نصیبی گوارہ نہیں مجھے

وہ کیا خوشی جو ہاتھ ملا کر گزر گئی

یہ کیا ہوا کہ میں تو بڑے پیار سے ملا

ترچھی نظر زمانہ کی مجھ پر ٹھہر گئی

سب مسکرا رہے ہیں ترقی کے نام پر

زندہ ہر آدمی ہے مگر روح مر گئی

شبنم نے میرے سامنے چوما تھا پیار سے

سوکھے ہوئے گلاب کی صورت نکھر گئی

کس پر یقیں کروں کسے سمجھوں میں رازداں

حشمتؔ یہ کشمکش مرے جیون میں بھر گئی